పాఠశాలల్లో అగ్ని భద్రత నిబంధనలపై డీజీ వెంకటరమణ వెల్లడి

పాఠశాలలు పునఃప్రారంభం అయ్యే సమయంలో, ఏపీ అగ్నిమాపక శాఖ విస్తృత తనిఖీలు చేపడుతోంది. అగ్ని ప్రమాదాల నివారణకు పాఠశాలల యాజమాన్యాలు తప్పనిసరిగా పాటించాల్సిన నిబంధనలను డీజీ వెంకటరమణ వివరించారు.

ప్రతి పాఠశాలలో రెండు మెట్లు, ఒక్కో స్టెప్‌ కేస్ 1.5 మీటర్ల వెడల్పుతో ఉండాలి. ఒక తరగతి గదిలో విద్యార్థుల సంఖ్య 45 దాటితే, రెండు తలుపులు (ఎంట్రెన్స్, ఎగ్జిట్) ఉండాలి. గ్రౌండ్, ఫస్ట్ ఫ్లోర్ వరకు భవనాల్లో ఫైర్ ఎక్స్‌టింగ్విషర్‌లతో పాటు 10,000 లీటర్ల నీటి సంప్, 5 HP మోటార్ సరిపోతుంది. 15 మీటర్ల కంటే ఎత్తైన భవనాల్లో టెర్రస్‌పై 10,000 లీటర్ల ట్యాంక్, బూస్టర్ పంప్, ప్రతి ఫ్లోర్‌లో ఫైర్ ఎక్స్‌టింగ్విషర్‌లు తప్పనిసరి. నేషనల్ బిల్డింగ్ కోడ్ ప్రకారం పాఠశాలల ఎత్తు 30 మీటర్లు మించకూడదు.

రాష్ట్ర వ్యాప్తంగా 175 అగ్నిమాపక కేంద్రాల పరిధిలో ఒక్కో కేంద్రం నెలకు నాలుగు పాఠశాలల్లో మాక్‌ డ్రిల్స్ నిర్వహిస్తోంది. ఇప్పటికే 3,600 స్కూళ్లలో అవగాహన కార్యక్రమాలు, మాక్‌ డ్రిల్స్ పూర్తయ్యాయి. ఫలితంగా రాష్ట్రంలో 80 శాతం పాఠశాలలు ఫైర్‌ సేఫ్టీ నిబంధనలు పాటిస్తున్నాయి. మిగతా 20-25 శాతం స్కూళ్లను కూడా త్వరలో పూర్తి స్థాయిలో నిబంధనలకు అనుగుణంగా తీసుకురానున్నామని డీజీ తెలిపారు.

అగ్ని ప్రమాదం జరిగితే ఎదుర్కొనేందుకు ప్రతి స్కూలులో రెస్క్యూ, ఫైర్‌ ఫైటింగ్, ఎవాక్యువేషన్ టీమ్‌లను ఏర్పాటు చేస్తున్నారు. టీచర్లు, స్టూడెంట్లకు కూడా శిక్షణ ఇస్తున్నారు. అగ్ని ప్రమాదాలపై అవగాహన కోసం రెండు నిమిషాల జింగిల్ తయారు చేశామని, మరో రెండు మూడు జింగిల్స్ రూపొందిస్తున్నామని డీజీ చెప్పారు.

పిల్లలను స్కూల్లో చేర్పించే ముందు తల్లిదండ్రులు ఆయా స్కూళ్లు అగ్నిమాపక నిబంధనలు పాటిస్తున్నాయా, నిరభ్యంతర పత్రం ఉందా అని చూసుకోవాలని ఆయన సూచించారు. పాఠశాలల యాజమాన్యాలు సహకారంతో భద్రతా ప్రమాణాలు పెంచుతున్నామన్నారు.