తొలి ఏకాదశి పర్వదినాన పండరీపురం విఠలుడి దర్శనానికి లక్షలాది మంది భక్తులు తరలి రాక

తొలి ఏకాదశి పర్వదినాన్ని పురస్కరించుకుని మహారాష్ట్రలోని పండరీపురం శ్రీ విఠల రుక్మిణి ఆలయానికి లక్షలాది మంది భక్తులు తరలివచ్చారు. పల్లకీలతో వచ్చే భక్తులతో పాటు స్థానిక గ్రామ ప్రజలు కూడా దర్శనానికి రావడంతో నిన్నటి కంటే నేడు మరింత రద్దీగా మారింది.

భక్తులందరిలోనూ పేద, ధనిక, చిన్న, పెద్ద అనే తారతమ్యం కనిపించదు. పురుషులు తెల్లని దుస్తులు, మహిళలు ఒకేలాంటి చీరలు ధరించి భగవంతుడిలో సమానత్వం చూపించే విధంగా స్వామిని దర్శించుకుంటున్నారు.

మహారాష్ట్రలోని ప్రాచీన వార్కరీ సంప్రదాయం ఇప్పటికీ కొనసాగుతోంది. చిన్నపిల్లల నుంచి పెద్దల వరకు ఈ సంప్రదాయాన్ని పాటిస్తున్నారు. తర్వాత తరాలకు దీనిని అలవాటు చేస్తున్న తల్లిదండ్రులు పిల్లలను కూడా దిండీల్లో (యాత్రికుల బృందాలు) తీసుకువస్తున్నారు.

ఇంతకు ముందు ఈ సంప్రదాయం గురించి తెలియని కొత్త భక్తులు కూడా గత రెండు, మూడు సంవత్సరాలుగా పాండురంగ మహాత్మ్యం తెలుసుకొని, తొలి ఏకాదశి పర్వదినానికి హాజరవుతున్నట్లు స్థానిక భక్తులు తెలిపారు. ఈ వార్కరీ సంప్రదాయం అలాగే కొనసాగుతుందని వారు ఆశాభావం వ్యక్తం చేశారు.