అంబేద్కర్ కోనసీమ జిల్లా ఓడలరేవు నుంచి చేపల వేటకు వెళ్లిన ఏడుగురు మత్స్యకారుల ఆచూకీ లేదు

అంబేద్కర్ కోనసీమ జిల్లా అల్లవరం మండలం ఓడలరేవు నుంచి చేపల వేటకు వెళ్లిన ఏడుగురు మత్స్యకారులు 20 రోజులుగా కనిపించడం లేదు. వీరి ఆచూకీ కోసం సముద్రంలో పెద్ద ఎత్తున గాలింపు కొనసాగుతోంది.

ఈ నెల 3న వీరు ఓ పడవలో సముద్రంలోకి చేపల వేటకు వెళ్లారు. పది రోజులకు సరిపడే నిత్యవసర సామగ్రి, మంచు తీసుకెళ్లారు. రెండు రోజుల తర్వాత వారి సెల్‌ఫోన్ సిగ్నల్స్ ఆగిపోయాయి. ఆ రోజు సముద్రం అల్లకల్లోలంగా ఉండటంతో ఏదైనా ప్రమాదం జరిగిందేమో అనే అనుమానాలు మొదలయ్యాయి. ఈ నెల 13న వీరు తిరిగి రావాల్సి ఉంది. కానీ రాలేదు.

ఈ నెల 17 నుంచి కోస్ట్ గార్డ్, నౌకాదళ బృందాలు గాలింపు చర్యలు నిర్వహిస్తున్నాయి. చెన్నై, విశాఖ, కాకినాడ కేంద్రాల నుంచి నాలుగు కోస్ట్ గార్డ్ నౌకలు గాలింపులో పాల్గొంటున్నాయి. ఓడలరేవు తీరం నుంచి 300 నాటికల్ మైళ్ల పరిధిలో గాలింపు కొనసాగుతోంది. విశాఖ నుంచి పారాదీప్ సముద్ర జలాల వరకు ప్రత్యేక బృందాలు గాలిస్తున్నాయి. ఉపగ్రహ సమాచారం, సముద్ర ప్రవాహాల దిశ, ఇతర మత్స్యకారుల నుంచి వచ్చిన సమాచారం ఆధారంగా ఈ చర్యలు సాగుతున్నాయి.

అయితే ఇప్పటివరకు వారి జాడకు సంబంధించిన కీలక ఆధారాలు లభించలేదు. గల్లంతైన వారి కుటుంబ సభ్యులు తీవ్ర ఆందోళనలో ఉన్నారు. మత్స్యశాఖ మంత్రి కింజరాపు అచ్చెన్నాయుడు కుటుంబాలను పరామర్శించారు. ఎక్కడ ఉన్నా వెతికించి పట్టుకుంటామని హామీ ఇచ్చారు. గాలింపు చర్యలు కొనసాగుతున్నాయి.