చైనా బిజినెస్ వీసాల్లో భారతీయులకు అడ్డంకులు: తిరస్కరణలు 95 శాతం

చైనా వ్యాపార వీసాల జారీలో భారతీయ కంపెనీలకు ఎదురవుతున్న ఇబ్బందులు తీవ్రమవుతున్నాయి. భారత ఎగ్జిక్యూటివ్లు, ఇంజనీర్లు, టెక్నికల్ నిపుణులు, భారత్లో పనిచేస్తున్న చైనా కంపెనీల ఉద్యోగులు కూడా చైనా వెళ్లేందుకు అవసరమైన బిజినెస్ వీసాలు పొందడంలో తీవ్రమైన అడ్డంకులు ఎదుర్కొంటున్నారు. దీని ప్రభావం అప్పుడే కనిపిస్తోంది. కంపెనీలు కీలక సమావేశాలను చైనా నుంచి సింగపూర్, థాయిలాండ్, మలేషియా, హాంకాంగ్ వంటి దేశాలకు తరలిస్తున్నాయి.

పలు నివేదికల ప్రకారం చైనాలో భాగస్వాములున్న అనేక భారత కంపెనీల వీసా దరఖాస్తులు తిరస్కరణకు గురవుతున్నాయి. తిరస్కరణ రేటు 95 శాతం వరకు పెరిగినట్టు తెలుస్తోంది. ఎలక్ట్రానిక్స్, ఆటోమొబైల్, టెక్నాలజీ రంగాల్లోని భారత కంపెనీలు చైనా సప్లయర్లు, టెక్నాలజీ భాగస్వాములు, తయారీ వ్యవస్థలపై ఆధారపడుతున్నాయి. ఫ్యాక్టరీల సందర్శన, సప్లయ్ చెయిన్ ఒప్పందాల చర్చలు, ఉత్పత్తి పర్యవేక్షణ, టెక్నాలజీ బదిలీ వంటి పనుల కోసం నేరుగా చైనా వెళ్లాల్సి ఉంటుంది. వీసాలు లేకపోవడంతో థర్డ్ కంట్రీల్లో సమావేశాలు, వీడియో కాల్స్, నిర్ణయాల వాయిదా వంటి పరిష్కారాలను కంపెనీలు ఎంచుకుంటున్నాయి.

2020 గల్వాన్ లోయ ఘర్షణ అనంతరం భారత్-చైనా ఆర్థిక సంబంధాలు ఒత్తిడికి లోనయ్యాయి. న్యూఢిల్లీ ప్రెస్ నోట్ 3 కింద చైనా పెట్టుబడులపై నిబంధనలు కఠినతరం చేసింది. చైనా జాతీయుల వీసాలపైనా ఆంక్షలు విధించింది. ఆ తర్వాత చాలా ఏళ్ల పాటు రెండు దేశాల కంపెనీలు థర్డ్ కంట్రీల్లో లేదా వర్చువల్గా సమావేశాలు నిర్వహించాయి. సంబంధాలు మెరుగుపడుతున్న నేపథ్యంలో భారత్ కొన్ని ఆంక్షలను సడలించడం మొదలుపెట్టింది. కానీ ఇప్పుడు చైనా వీసా వైఖరి కొత్త అడ్డంకిగా మారింది. చైనా కొత్త ఎంట్రీ అండ్ ఎగ్జిట్ అడ్మినిస్ట్రేషన్ నిబంధనలను తీసుకొచ్చింది. వీటిని సెప్టెంబర్ 15 నుంచి అమలు చేయనుంది. అప్లికేషన్లు, స్పాన్సర్లు, ఇమ్మిగ్రేషన్ మధ్యవర్తులపై కంప్లయన్స్ అవసరాలు పెరుగుతాయి.

ప్రస్తుతం రెండు దేశాల మధ్య నేరుగా విమానాలు తిరిగి ప్రారంభమయ్యాయి. చైనా పౌరులకు టూరిస్ట్ వీసాలను భారత్ పునఃప్రారంభించేందుకు చర్యలు తీసుకుంది. అయితే ఈ కొత్త వీసా ఇబ్బంది కేవలం ప్రయాణ అసౌకర్యానికి మించి, చైనా విడిభాగాలు, యంత్రాలు, టెక్నాలజీ, సప్లయర్లపై ఆధారపడే భారత తయారీ కంపెనీలపై ప్రభావం చూపే అవకాశం ఉంది.