గుంటూరు ఆర్టీసీ బస్ స్టాండ్‌లో కానిస్టేబుల్‌పై దాడి కేసు నమోదు

పాత గుంటూరులోని ఆర్టీసీ బస్ స్టాండ్ వద్ద కానిస్టేబుల్‌పై జరిగిన దాడిపై కేసు నమోదు చేసినట్టు గుంటూరు పోలీసులు తెలిపారు.

కానిస్టేబుల్ ఇచ్చిన ఫిర్యాదు ఆధారంగానే కేసు నమోదు చేశామని పోలీసులు చెప్పారు. ఘటనకు సంబంధించిన CCTV ఫుటేజీని పరిశీలిస్తున్నట్టు తెలిపారు. దాడిలో పాల్గొన్న నిందితులను త్వరలోనే అరెస్ట్ చేస్తామని వెల్లడించారు.

ఈ కేసులో ఎలాంటి రాజకీయ ఒత్తిడి లేదని పోలీసులు స్పష్టం చేశారు. దాడి చేసిన వారు TDP కార్యకర్తలని, అందుకే కేసు నమోదు ఆలస్యమైందని కొన్ని వర్గాల నుంచి ఆరోపణలు వచ్చాయి. వీటిని DSP విలేకరుల సమావేశంలో ఖండించారు.

పోలీసులపై దాడిని ఉపేక్షించేది లేదని, ఏ పార్టీకి చెందిన వారైనా కఠినంగా శిక్షిస్తామని DSP తెలిపారు. మరో వర్గం నుంచి ఇప్పటివరకు ఎలాంటి ఫిర్యాదు రాలేదన్నారు. నిందితుల కోసం గాలింపు చర్యలు కొనసాగుతున్నాయి.