ఏపీ తీరంలో వేట నిషేధం ముగియడంతో మత్స్యకారులు వేటకు దిగారు, సమస్యలు యథాతథం

ఏపీ తీర ప్రాంతంలో రెండు నెలల వేట నిషేధం ముగియడంతో మత్స్యకారులు ఒక్కసారిగా సముద్రంలోకి వేటకు దిగారు. వేలాది బోట్లు లంగరు ఎత్తడంతో తీర గ్రామాలు కళకళలాడుతున్నాయి. ప్రత్యేక పూజలు నిర్వహించి, మత్స్యకారులు జీవన పోరాటానికి సిద్ధమయ్యారు.

రాష్ట్రంలో దాదాపు 2 లక్షల మంది మత్స్యకారులు ఉండగా, మరో 6 లక్షల మంది ప్రత్యక్షంగా, పరోక్షంగా ఈ రంగంపై ఆధారపడి జీవిస్తున్నారు. విశాఖ తీరంలోనే 30 వేల మంది నేరుగా పనిచేస్తున్నారు. కోనసీమ జిల్లాలో 22 వేల కుటుంబాలు మత్స్యకార వృత్తి మీద ఉన్నాయి.

కానీ, ఈ వృత్తి ఆదాయం ఇప్పుడు సమస్యల వలయంలో చిక్కుకుంది. డీజిల్ ధర ఇటీవల 7 రూపాయలు పెరగడంతో వేట ఖర్చు విపరీతంగా పెరిగింది. లీటరుకు 9 రూపాయల ప్రభుత్వ రాయితీ సరిపోవడం లేదని మత్స్యకారులు చెబుతున్నారు. ఒక్కో బోట్ ట్రిప్‌కు 8 నుంచి 10 లక్షలు ఖర్చవుతుండగా, చేపలు తక్కువగా దొరికితే తీవ్ర నష్టాలు వస్తాయని వారు వివరించారు.

అనిశ్చిత ఆదాయం, అప్పుల భారం కారణంగా చాలా మంది బోట్లు అమ్మేసే పరిస్థితి నెలకొంది. వేటలో ప్రమాదవశాత్తు బోట్లు దెబ్బతిన్నా, మునిగినా ఎలాంటి పరిహారం అందడం లేదని వారు ఆరోపిస్తున్నారు. తమకు మెరుగైన రాయితీ, బీమా సౌకర్యం, ప్రమాద పరిహారం కల్పించాలని మత్స్యకారులు ప్రభుత్వాన్ని డిమాండ్ చేస్తున్నారు.