పోలవరం జిల్లా చింతూరు ఏజెన్సీలో వరద ముప్పు: 48 అడుగులకు చేరిన ప్రవాహం, 50 గ్రామాలకు రాకపోకలు నిలిచిపోయాయి

పోలవరం జిల్లా చింతూరు ఏజెన్సీ ప్రాంతంలో వరద పరిస్థితి తీవ్రంగా మారింది. కోనవరం వద్ద శబరి-గోదావరి సంగమం ప్రాంతంలో వరద ప్రవాహం మూడో ప్రమాద హెచ్చరిక స్థాయిని దాటి 48 అడుగులకు చేరింది.

కోనవరం శబరి బ్రిడ్జికి ఆనుకుని వరద నీరు ప్రమాదకరంగా ప్రవహిస్తోంది. చింతూరు మండలం సోకిలేరు కాజువే, కోనవరం మండలం కొండరాజుపేట కాజువేలపై నుంచి వరద నీరు భారీగా ప్రవహిస్తోంది. దీంతో రాకపోకలు పూర్తిగా నిలిచిపోయాయి. కోనవరం-భద్రాచలం ప్రధాన రహదారిపై కూడా వరద నీరు రావడంతో రవాణా స్తంభించింది. ఏజెన్సీలోని 50కి పైగా గ్రామాలకు రాకపోకలు తెగిపోయాయి.

ముంపు ముప్పు ఉన్న ఉదయభాస్కర్ కాలనీ నివాసితులను అధికారులు పునరావాస కేంద్రాలకు తరలిస్తున్నారు. మొత్తం 35,000 కుటుంబాలను గుర్తించి, వారి కోసం 150 పునరావాస కేంద్రాలు ఏర్పాటు చేశారు. సహాయక చర్యల కోసం 32 బోట్లను సిద్ధం చేశారు. ప్రత్యేక కంట్రోల్ రూమ్లను అందుబాటులో ఉంచి రెస్క్యూ కార్యకలాపాలు వేగవంతం చేశారు.

జిల్లా కలెక్టర్ దినేష్ కుమార్ వీఆర్‌పురం మండలంలోనే ఉండి పరిస్థితిని నిరంతరం సమీక్షిస్తున్నారు. ఆయన మాట్లాడుతూ, "నిన్నటి నుంచి జిల్లా యంత్రాంగం అప్రమత్తంగా ఉంది. చింతూరులో 24/7 కంట్రోల్ రూమ్ ఏర్పాటు చేశాం. తహసీల్దార్ కార్యాలయంలో మరో కంట్రోల్ రూమ్ ఉంది. జిల్లాలో 189 హాబిటేషన్లను, సుమారు 34 వేల కుటుంబాలను గుర్తించాం. 2022లో వరద వచ్చినట్లయితే అంత ప్రభావం ఉండవచ్చు. మేం ఫస్ట్ లెవెల్, సెకండ్ లెవెల్ ఇలా మ్యాప్ చేసుకున్నాం. కొన్ని 60 అడుగుల వరకు, కొన్ని 65 అడుగుల వరకు వస్తాయి. మొత్తంగా 150 రిలీఫ్ సెంటర్లు సిద్ధం చేశాం" అని వివరించారు.