భూ వివాదం కేసులో మాజీ స్పీకర్ తమ్మినేని సీతారాం విచారణకు హాజరు

శ్రీకాకుళం: భూ వివాదం కేసులో వైసీపీ నేత, మాజీ స్పీకర్ తమ్మినేని సీతారాం మంగళవారం శ్రీకాకుళం గ్రామీణ పోలీస్ స్టేషన్‌లో విచారణకు హాజరయ్యారు. ఈ కేసులో ఇప్పటికే ఆయనకు కోర్టు బెయిల్ ఇచ్చినప్పటికీ, విచారణకు హాజరు కావాలని సూచించింది.

భూ యజమాని బతికి ఉండగా మరణ ధ్రువీకరణ పత్రం సృష్టించి, కోట్ల రూపాయల భూమిని అక్రమంగా రిజిస్ట్రేషన్ చేయించిన ఆరోపణలతో ఈ కేసు నమోదైంది. ఆయనతో పాటు భార్య వాణిశ్రీ, ఇతరులపై పోలీసులు కేసు నమోదు చేశారు. తమ్మినేని సీతారాం తర్వాత వాణిశ్రీని కూడా పోలీసులు విచారించనున్నారు.

ఈ కేసులో మొత్తం 13 మందిని నిందితులుగా పోలీసులు చేర్చగా, 8 మంది ఇప్పటికే పట్టుబడ్డారు. మరో ముగ్గురు నిందితులు పరారీలో ఉండగా, తమ్మినేని సీతారాం కుమారుడు నాగు కూడా పరారీలో ఉన్నాడు. కేసు విచారణను ఆర్‌ఐ సురేష్ నిర్వహిస్తున్నట్లు పోలీసులు తెలిపారు.