నల్లగొండలో ఒకే కుటుంబంలో నలుగురు హత్య: నిందితుల జాడ లేదు

నల్లగొండ జిల్లా కేంద్రంలో ఒకే కుటుంబానికి చెందిన నలుగురు హత్యకు గురైన ఘటనలో పోలీసులకు ఇప్పటివరకు నిందితుల జాడ తెలియలేదు.

పోస్ట్మార్టం నివేదిక ప్రకారం బాధితులను కత్తులతో పొడిచి చంపినట్లు తేలింది. ఈ హత్యలు రాత్రి 11 గంటల తర్వాత జరిగి ఉండవచ్చని పోలీసులు భావిస్తున్నారు. సంఘటనా స్థలంలో నిందితులు ఎలాంటి ఆధారాలు వదిలిపెట్టకుండా తప్పించుకున్నారు.

దర్యాప్తు కోసం ప్రత్యేక బృందాలు కాల్ డేటా, సీసీటీవీ ఫుటేజీని విశ్లేషిస్తున్నాయి. అయితే, సీసీ కెమెరాల్లో అనుమానాస్పద వ్యక్తులు కనిపించలేదు. టవర్ డంప్ డేటాలోనూ అనుమానాస్పద కాల్స్ గుర్తించలేదు. నిందితులు ఐదు నుంచి ఆరుగురు ఉండవచ్చని పోలీసులు అనుమానిస్తున్నారు. అనుమానం ఉన్న కొందరిని అదుపులోకి తీసుకొని విచారిస్తున్నారు.

ఈ ఘటన చోటు చేసుకుని ఐదు రోజులు గడిచినా నిందితులు ఎవరు, ఎలా వచ్చారు, ఎందుకు చంపారు అనే ప్రశ్నలకు సమాధానం లభించలేదు. ఈ కేసు పోలీసులకు సవాలుగా మారింది.