ప్రభుత్వ పాఠశాలల అల్పాహార పథకం విజయవంతం: డిప్యూటీ సీఎం భట్టి

తెలంగాణ డిప్యూటీ సీఎం భట్టి విక్రమార్క ప్రభుత్వ పాఠశాలల అల్పాహార పథకాన్ని అభినందించారు. ఆకలి ఏ విద్యార్థి చదువుకు అడ్డంకిగా మారకూడదని ఆయన స్పష్టం చేశారు. హరే రామ హరే కృష్ణ సంస్థతో కలిసి పూర్తి ఆటోమేటెడ్ కిచెన్ల ద్వారా రుచికరమైన, శుచిగా ఉన్న అల్పాహారాన్ని ప్రతిరోజూ విద్యార్థులకు అందిస్తున్నామని తెలిపారు.

ఈ పథకం రాష్ట్రంలో తొలిసారిగా అమలవుతోంది. నేడు అందించే పౌష్టికాహారం రేపటి రాష్ట్ర భవిష్యత్తుకు బలమైన పునాది అవుతుందని ఆయన ‘ఎక్స్’లో పోస్ట్ చేశారు. విద్యార్థులు శారీరకంగా, మానసికంగా ఎదిగి చదువులో రాణించాలంటే నాణ్యమైన ఆహారం అత్యంత కీలకమని డిప్యూటీ సీఎం నొక్కి చెప్పారు.

ఈ పథకం అమలును ప్రత్యక్షంగా చూసి తాను చాలా సంతృప్తి చెందానని ఆయన అన్నారు. ప్రభుత్వ పాఠశాలల్లో చదివే ప్రతి విద్యార్థికీ ఉదయం అల్పాహారం అందడం ద్వారా వారి ఆరోగ్యం మెరుగుపడుతుందని, చదువుపై దృష్టి పెరుగుతుందని డిప్యూటీ సీఎం వివరించారు.