పూడిమడక తీరంలో పడవల ప్రమాదం; నలుగురు సర్వే కార్మికులను రక్షించారు

అనకాపల్లి జిల్లా అచ్యుతాపురం మండలం పూడిమడక సముద్ర తీరంలో ఓ ప్రమాదం తప్పింది. సముద్ర గర్భంలో మట్టి పరీక్షలు నిర్వహిస్తున్న సర్వే కార్మికులు ప్రయాణిస్తున్న పడవల తాళ్లు తెగిపోయాయి.

దాంతో నలుగురు కార్మికులు సముద్రంలో చిక్కుకుపోయారు. సమాచారం అందుకున్న పోలీసులు, నేవల్ అధికారులు, కోస్ట్ గార్డ్ సిబ్బంది, స్థానిక మత్స్యకారులు వెంటనే సహాయ చర్యలు చేపట్టారు.

కొద్దిసేపటికే నలుగురిని సురక్షితంగా తీరానికి చేర్చారు. ఉత్తరప్రదేశ్, పశ్చిమబెంగాల్‌కు చెందిన ఈ కార్మికులు క్షేమంగా ఉన్నట్లు తెలుస్తోంది. ఈ ఘటనలో ఎవరికీ గాయాలు కాలేదు.