కరీంనగర్ ఇల్లంతకుంటలో గ్రామీణ యువతకు ఉచిత AI శిక్షణ శిబిరం ప్రారంభం

కరీంనగర్ జిల్లా ఇల్లంతకుంటలో గ్రామీణ యువతకు ఉచిత AI శిక్షణ శిబిరాన్ని ఏర్పాటు చేశారు. యప్ టీవీ, ట్యూరిటో సంస్థల వ్యవస్థాపకుడు, CEO పాడి ఉదయనందన్ రెడ్డి ఈ శిబిరాన్ని ప్రారంభించారు.

ఈ కార్యక్రమానికి జమ్మికుంట, ఇల్లంతకుంట, హుజూరాబాద్ మండలాల నుంచి విద్యార్థులు, ప్రజా ప్రతినిధులు, స్థానికులు పెద్ద సంఖ్యలో హాజరయ్యారు.

ప్రపంచం మొత్తం AI తో వేగంగా మారిపోతోందని ఉదయనందన్ రెడ్డి అన్నారు. ఈ మార్పుకు అనుగుణంగా ప్రతి ఒక్కరూ మారాల్సిన అవసరం ఉందని చెప్పారు. దేశ జనాభాలో 60 శాతానికి పైగా యువతే ఉన్నారని ఆయన పేర్కొన్నారు. రోజువారీ జీవితంలో AI వాడటం నేర్చుకుంటే యువత వేగంగా ఎదగగలరని తెలిపారు.

రాబోయే ఐదేళ్లలో ఆరోగ్యం, విద్య, వ్యవసాయం, వ్యాపారం అన్ని రంగాల్లో మార్పులు వస్తాయని ఆయన అన్నారు. AI పై అవగాహన పట్టణవాసులకే కాదు, గ్రామీణ యువత, మహిళలు, రైతులకు కూడా రావాలని చెప్పారు. దూర ప్రాంతాల నుంచి డాక్టర్లు కూడా మెరుగైన ఆరోగ్య సేవలు అందించడం, వ్యవసాయంలో పెస్టిసైడ్ వాడకం, నీటి వినియోగం, పంట మార్పిడి వంటి విషయాల్లో AI ఉపయోగపడుతుందని వివరించారు.

ఉద్యోగాల్లో AI skill sets లేకపోతే కంపెనీలు తీసుకోవని ఆయన అన్నారు. ఇల్లంతకుంట ప్రాంతంలో 16-17 ఏళ్ల నుంచి కంప్యూటర్ సెంటర్ నడుస్తోంది. అక్కడ చదివిన చాలామంది విద్యార్థులు నేర్చుకోవడమే కాదు, ఉద్యోగాలు కూడా సాధించారని ఆయన తెలిపారు. వారిలో కొందరు సొంత ఊరిలోనే పని చేస్తుండగా, మరి కొందరు హైదరాబాద్ లో ఉద్యోగాలు చేస్తున్నారు.