10 రోజుల్లో మూడోసారి పెట్రోల్, డీజిల్ ధరలు పెరిగాయి

ప్రభుత్వ రంగ చమురు సంస్థలు దేశవ్యాప్తంగా పెట్రోల్, డీజిల్ ధరలను మరోసారి పెంచాయి. లీటర్ పెట్రోల్‌పై 87 పైసలు, డీజిల్‌పై 91 పైసలు పెరిగాయి. 10 రోజుల్లో ఇది మూడోసారి పెరుగుదల.

ఢిల్లీలో లీటర్ పెట్రోల్ ధర ₹98.64 నుంచి ₹99.51కు చేరింది. డీజిల్ ₹91.58 నుంచి ₹92.49కు పెరిగింది. ఒక వారంలో పెట్రోల్, డీజిల్ ధరలు లీటర్‌కు దాదాపు ₹5 వరకు పెరిగాయి.

ఆంధ్రప్రదేశ్, తెలంగాణలో పెట్రోల్‌పై 94 పైసలు, డీజిల్‌పై 96 పైసలు పెరిగాయి. విశాఖపట్నంలో లీటర్ పెట్రోల్ ₹113.53గా ఉంది. విజయవాడలో ₹114.30, తిరుపతిలో ₹115, గుంటూరులో ₹114.73గా పెట్రోల్ ధర ఉంది. హైదరాబాద్‌లో లీటర్ పెట్రోల్ ₹112.74కు చేరింది.

మే 15 నుంచి ఇప్పటివరకు ఆంధ్రప్రదేశ్‌లో పెట్రోల్‌పై ₹5.18 పైసలు, డీజిల్‌పై ₹5.05 పైసలు పెరిగాయని APFPTI స్టేట్ ప్రెసిడెంట్ రావి గోపాలకృష్ణ తెలిపారు. ప్రస్తుతం ప్రతి 3-4 రోజులకు ఒకసారి ధరల మార్పులు జరుగుతున్నాయని ఆయన పేర్కొన్నారు.

ఇరాన్-ఇజ్రాయెల్ ఉద్రిక్తతల నేపథ్యంలో అంతర్జాతీయ మార్కెట్లో క్రూడ్ ఆయిల్ ధరలు గణనీయంగా పెరిగాయి. యుద్ధానికి ముందు బ్యారెల్ ధర $63–$72 మధ్య ఉండేది. ఇప్పుడు అది రెండింతలు పెరిగింది. హార్మూజ్ జలసంధిపై ఇరాన్ నియంత్రణ హెచ్చరికలు కొనసాగుతున్నాయి. ప్రపంచ చమురు సరఫరాలో 20% ఈ జలసంధి మీదుగా జరుగుతుంది.

చమురు సంస్థలకు ఇప్పటికీ నష్టాలు కొనసాగుతున్నాయని, మరో ₹10–15 వరకు ధరలు పెరిగే అవకాశం ఉందని రావి గోపాలకృష్ణ హెచ్చరించారు. ఈ పెరుగుదల నిత్యావసర వస్తువుల ధరలపై కూడా ప్రభావం చూపుతుందని వాహనదారులు ఆందోళన వ్యక్తం చేస్తున్నారు.