గచ్చిబౌలి చోరీ కేసులో నేపాల్ ముఠా అరెస్ట్, 8 కిలోల స్వర్ణం స్వాధీనం

గచ్చిబౌలి హిల్ రిడ్జ్ విల్లాస్ లో జరిగిన చోరీ కేసును సైబరాబాద్ పోలీసులు ఛేదించారు. ఈ కేసులో నేపాల్ కు చెందిన ముగ్గురు నిందితులను ఉత్తరప్రదేశ్ లోని రాంపూర్ జిల్లా ఉదంపూర్ లో అరెస్ట్ చేశారు. నిందితుల నుండి సుమారు 8 కిలోల బంగారు ఆభరణాలు, 1.5 కిలోల వెండి వస్తువులు స్వాధీనం చేసుకున్నట్లు సైబరాబాద్ పోలీస్ కమిషనర్ ఎం రమేష్ రెడ్డి తెలిపారు.

ఈ చోరీకి పాల్పడింది ఇంట్లో పని చేస్తున్న భార్యాభర్తలు. వారు నెల రోజుల క్రితమే ఆ ఇంట్లో పనికి చేరారు. బాధితులు ఇంట్లో లేని సమయంలో, లాకర్ పక్కనే కలశం చెంబు పక్కన ఉన్న తాళం చెవిని ఉపయోగించి లాకర్ తెరిచి అన్ని నగలు దొంగిలించి పారిపోయారు. ఈ ఘటనలో మూడో వ్యక్తి సహాయం కూడా తీసుకున్నారు. దొంగిలించబడిన ఆభరణాలు ఆ కుటుంబానికి మూడు తరాల నాటివని, వాటికి యాంటిక్ విలువతో పాటు సెంటిమెంటల్ విలువ ఉందని పోలీసులు తెలిపారు.

ఆదివారం ఒక బంగారు గొలుసు పోయిందన్న ఫిర్యాదు రావడంతో దర్యాప్తు మొదలైంది. పోలీస్ బృందాలు స్థానికంగా ఉన్న నేపాల్ కమ్యూనిటీ సహాయంతో నిందితుల ఆచూకీని కైరానా జిల్లా వరకు గుర్తించాయి. హైదరాబాద్ టాస్క్ ఫోర్స్ డిసిపి వైభవ్ గైక్వాడ్, ఉత్తరాఖండ్, ఉత్తరప్రదేశ్, బీహార్ పోలీసులు, ఇంటెలిజెన్స్ బ్యూరో సహకారంతో జూన్ 9 న రాత్రి 2.30 గంటలకు వాహన తనిఖీలో నిందితులు కమల్ షాహి, విమల్ షాహి, వారి సహచరిణి కల్పనలను అదుపులోకి తీసుకున్నారు.

నిందితులను అక్కడి స్థానిక కోర్టులో హాజరుపరచి, స్వాధీనం చేసిన నగలను అప్పగించి, ట్రాన్సిట్ వారెంట్ పై హైదరాబాద్ కు తరలించారు. ఈ దొంగతనానికి సురేష్ షాహీ అనే గ్యాంగ్ లీడర్ ప్రేరేపించినట్లు తెలిసింది. అతని కోసం గాలింపు కొనసాగుతోంది.