తూర్పు గోదావరి రైతు 7 ఎకరాల్లో 120 రకాల పండ్లతో ప్రకృతి వ్యవసాయం

తూర్పు గోదావరి జిల్లా గోకవరం మండలం పెంటపల్లి గ్రామానికి చెందిన రైతు గండి శ్రీనివాస్ 7 ఎకరాల వ్యవసాయ భూమిలో 120 రకాల పండ్ల మొక్కలను సాగు చేస్తున్నారు.

ఆయన ఐదు లేయర్ల మోడల్‌ను అమలు చేస్తూ పండ్ల మొక్కల మధ్య ఖాళీ స్థలాల్లో కూరగాయలు, ఆకుకూరలు, పసుపు వంటి పంటలను పెంచుతున్నారు. రసాయన ఎరువులు, క్రిమి సంహారకాలు వాడకుండా జీవామృతం, ఘన జీవామృతం, చేప-బెల్లం ద్రావణం, కోడిగుడ్డు-నిమ్మరసం, పంచగవ్య, బయోచారు వంటి సేంద్రియ ఇన్పుట్స్ స్వయంగా తయారు చేసుకుంటున్నారు.

పండ్లలో మామిడి, జీడిమామిడి, పనస, నిమ్మ, బత్తాయి, సీతాఫలం, పైనాపిల్ ఇలా వైవిధ్యంగా ఉన్నాయి. ప్రతి 3 మీటర్లకు ఒక మొక్క నాటే హై-డెన్సిటీ పద్ధతి వల్ల ఒక పంట పోయినా మరో పంట కొనసాగుతుంది. దీంతో ఏడాది పొడవునా కాయగూరలు, ఆకుకూరలు, పండ్లు దిగుబడి ఇస్తూ నిరంతర ఆదాయం అందిస్తున్నాయి.

శ్రీనివాస్ తయారు చేసే జీవామృతం, ఇతర ద్రావణాలను గోకవరం డివిజన్‌లోని నాలుగు మండలాల రైతులకూ సరఫరా చేస్తున్నారు. ఏపీ సీఎన్ఎఫ్ (ప్రకృతి వ్యవసాయ వాలన కేంద్రం) బృందం ఆయన పద్ధతులను గుర్తించి బయో రీసెర్చ్ సెంటర్‌గా ఆమోదించింది.

పండించిన ఉత్పత్తులను స్థానికంగా నేరుగా వినియోగదారులకు విక్రయిస్తున్నారు. రసాయనాలతో పండిస్తే వరి 30 బస్తాలు వస్తే, సేంద్రియంగా 20 బస్తాలు వచ్చినా కాయల నాణ్యత, అమ్మకపు ధర వల్ల ఎకరానికి రూ.60,000-70,000 ఆదాయం పొందుతున్నట్లు ఆయన చెబుతున్నారు. ప్రతి అంగుళం భూమిని ఉపయోగించుకుంటూ ప్రకృతితో మమేకమై తక్కువ పెట్టుబడితో లాభదాయక వ్యవసాయం సాధ్యమని గండి శ్రీనివాస్ నిరూపిస్తున్నారు.