స్మార్ట్ ఫోన్ వ్యసనానికి వీడ్కోలు: జెన్-జీ తెచ్చిన డిజిటల్ డిటాక్స్ విప్లవం, రూ.7900 కోట్ల మార్కెట్‌గా ఎదుగుతున్న పరిశ్రమ

స్మార్ట్ ఫోన్ వ్యసనం నుంచి బయటపడేందుకు జెన్-జీ మరియు మిలీనియల్ తరం యువత ఉద్దేశపూర్వకంగా డిజిటల్ డిటాక్స్‌ని ఎంచుకుంటోంది. ప్రపంచవ్యాప్తంగా ఈ ధోరణిని 'క్వైట్ రెవల్యూషన్' (నిశ్శబ్ద విప్లవం)గా పేర్కొంటున్నారు.

సర్వే ప్రకారం, నిరంతర నోటిఫికేషన్లు, సోషల్ మీడియా స్క్రోలింగ్‌తో విసిగిన 63% మంది జెన్-జీ మరియు మిలీనియల్స్ తమ ఫోన్లకు దూరంగా ఉండాలని నిర్ణయించుకున్నారు. చిన్నతనం నుంచి డిజిటల్ వాతావరణంలో పెరిగిన ఈ తరం, నిజమైన మానవ సంబంధాలు, మానసిక ప్రశాంతత కోసం వాస్తవ ప్రపంచంలో జీవించేందుకు మొగ్గు చూపుతోంది.

ఈ డిటాక్స్ కోసం యువత అనేక పద్ధతులు అవలంబిస్తున్నారు. స్మార్ట్‌ఫోన్లను పక్కనపెట్టి కేవలం కాల్స్, మెసేజ్ల కోసం పాత కీప్యాడ్ లేదా ఫ్లిప్ ఫోన్లు (డంప్ ఫోన్లు) వాడుతున్నారు. స్నేహితులతో కలిసినప్పుడు ఫోన్లను దూరంగా ఉంచాలనే నిబంధన కూడా పాటిస్తున్నారు.

అంతేకాదు, ఈ అవసరం ఒక భారీ వాణిజ్య పరిశ్రమగా మారింది. స్మార్ట్ ఫోన్ లాక్ బాక్స్‌లు, సబ్‌స్క్రిప్షన్ ఆధారిత డిజిటల్ డిటాక్స్ యాప్‌ల అమ్మకాలు జోరందుకున్నాయి. డేటా ఇన్‌సైట్ అంచనాల ప్రకారం, 2025లో ₹3,600 కోట్లుగా ఉన్న డిజిటల్ డిటాక్స్ మార్కెట్ విలువ 2026 నాటికి ₹7,900 కోట్లకు చేరుతుంది. ఏటా 12-16% చొప్పున వృద్ధి చెందుతూ ఈ మార్కెట్ 2032 నాటికి ₹14,700 కోట్లకు పెరుగుతుందని నివేదికలు చెబుతున్నాయి.

వివిధ యాప్‌లు, లాక్ బాక్స్‌ల కోసం యువత ₹3,000 నుంచి ₹16,000 వరకు ఖర్చు చేస్తోంది. ఫ్రీడమ్, ఓపాల్ వంటి యాప్‌లు నిర్ణీత సమయాల్లో ఫోన్‌ను ఆటోమేటిక్ గా లాక్ చేస్తాయి. అలాగే టైమర్ ఉన్న ఫిజికల్ లాక్ బాక్స్‌లో ఫోన్ పెట్టి నిర్ణీత సమయం వరకు తీయకుండా ఉండటం పెరిగింది.

ఈ విధంగా టెక్నాలజీతోనే టెక్నాలజీ వ్యసనానికి అడ్డుకట్ట వేస్తున్న ధోరణి కొత్త జీవన శైలిగా మారుతోంది.