విజయవాడ: రవీంద్రభారతీ స్కూల్‌లో విద్యార్థిని భవనంపై నుంచి దూకి గాయాలు

విజయవాడలోని సత్యనాడపురంలో ఉన్న రవీంద్రభారతీ స్కూల్‌లో విషాద ఘటన చోటుచేసుకుంది. ఎనిమిదో తరగతి చదువుతున్న ఒక విద్యార్థిని గురువారం మధ్యాహ్నం స్కూల్ భవనంపై నుంచి కిందకు దూకింది. దీంతో ఆమె తీవ్రంగా గాయపడినట్లు సమాచారం.

ప్రత్యక్ష సాక్షి వివరాల ప్రకారం, పక్కనే ఉన్న మరో స్కూల్‌లో చదివే తన పిల్లలకు భోజనం ఇవ్వడానికి వచ్చిన ఒక తల్లి పెద్ద శబ్దం విని చూడగా విద్యార్థిని కింద పడి ఉండడం గమనించారు. ఆమె తలకు, చేతికి బలమైన గాయాలయ్యాయి. వెంటనే స్కూల్ సిబ్బందికి సమాచారం ఇవ్వడంతో వారు విద్యార్థినిని సమీపంలోని స్వరా ఆస్పత్రికి తరలించారు.

స్కూల్ ప్రిన్సిపాల్ తెలిపిన వివరాల ప్రకారం, ఆ రోజు ఇంటర్నల్ పరీక్షలు జరుగుతున్నాయి. విద్యార్థిని ఉదయం నుంచి కొంత టెన్షన్‌తో ఉన్నట్లు క్లాస్‌మేట్స్ చెప్పారు. భవనం పై టెర్రస్‌ను సాధారణంగా లాక్ చేసి ఉంచుతామని, అయితే ఆ రోజు ట్యాంక్ క్లీనింగ్ నిమిత్తం గురువారం ఉదయం తెరిచి ఉంచడంతో విద్యార్థిని అటు వెళ్లి ఉండొచ్చని ప్రిన్సిపాల్ వివరించారు. స్కూల్‌పై ఇంతవరకు ఎలాంటి ఫిర్యాదులు లేవని, టీచర్లు కొట్టారనే ఆరోపణ తప్పని ఆమె తెలిపారు. విద్యార్థిని తరచూ అనారోగ్యం కారణంగా స్కూల్‌కు రావడం తక్కువని కూడా ఆమె పేర్కొన్నారు.

చికిత్స పొందుతున్న విద్యార్థిని ప్రస్తుతం స్పృహలో ఉన్నట్లు, మాట్లాడుతున్నట్లు స్కూల్ యాజమాన్యం తెలిపింది. కాలికి చర్మం క్రష్ అయినట్లు వైద్యులు చెప్పినట్లు సమాచారం. పోలీసులు, విద్యాశాఖ అధికారులు సంఘటన స్థలానికి చేరుకుని విచారణ ప్రారంభించారు.