36 ఏళ్ల తర్వాత సొంత గడ్డపైకి వస్తున్న కాశ్మీరీ పండిట్లు.. శ్రీనగర్‌లో జూన్‌లో గ్లోబల్ కాంక్లేవ్

1989-90లో కశ్మీర్ లోయలో ఉగ్రవాదం పెరిగిన నేపథ్యంలో సుమారు 3-5 లక్షల మంది కాశ్మీరీ పండిట్లు తమ ఇళ్లు, ఆలయాలు, భూములను వదిలి జమ్మూ, ఢిల్లీ, ముంబై వంటి ప్రాంతాలకు వలస వెళ్లాల్సి వచ్చింది.

36 ఏళ్ల తర్వాత, దేశవిదేశాల్లో స్థిరపడిన ఈ కుటుంబాలు తిరిగి తమ మూలాల వైపు చూడడానికి సిద్ధమవుతున్నాయి. జూన్ 6 నుంచి 14 వరకు 'గ్లోబల్ కాశ్మీర్ హెరిటేజ్ & స్టూడెంట్ కాంక్లేవ్ 2026' నిర్వహిస్తున్నారు. జూన్ 13, 14 తేదీల్లో శ్రీనగర్‌లోని షేర్-ఏ-కశ్మీర్ అంతర్జాతీయ సమావేశ కేంద్రంలో ప్రధాన సదస్సు జరుగుతుంది.

'జర్నీ ఆఫ్ రెసిలియెన్స్, రెనైసెన్స్ అండ్ రిటర్న్' అనే థీమ్‌తో జరిగే ఈ కార్యక్రమంలో అమెరికా, యూరప్, మధ్యప్రాచ్యం నుంచి కూడా పండిట్లు పాల్గొంటారు. వారసత్వ యాత్ర ప్రత్యేక ఆకర్షణగా ఉంటుంది. ఈ టూర్‌లో చారిత్రక ఆలయాలు, ఆధ్యాత్మిక ప్రదేశాలు, సాంస్కృతిక వారసత్వ స్థలాలను సందర్శిస్తారు. ముఖ్యంగా నియంత్రణ రేఖ (ఎల్ఓసీ) సమీపంలోని తీత్వాల్ శారదా ఆలయాన్ని సందర్శించనున్నారు.

ఏడు ప్రముఖ కాశ్మీరీ పండిట్ సంస్థలు కలిసి ఈ కాంక్లేవ్ నిర్వహిస్తుండగా, ప్రపంచవ్యాప్తంగా 30కి పైగా సంస్థలు సహకరిస్తున్నాయి. చరిత్ర, వారసత్వ పరిరక్షణ, యువత భవిష్యత్తు, రాజకీయ ప్రాతినిధ్యం, పునరావాసం వంటి అంశాలపై చర్చలు జరుగుతాయి.

ఈ కార్యక్రమానికి ప్రధాని నరేంద్ర మోదీ, కేంద్ర హోంమంత్రి అమిత్ షా, జమ్మూ కశ్మీర్ లెఫ్టినెంట్ గవర్నర్ మనోజ్ సిన్హ, ముఖ్యమంత్రి ఒమర్ అబ్దుల్లాలకు ఆహ్వానాలు పంపారు. లెఫ్టినెంట్ గవర్నర్ హాజరయ్యే అవకాశం ఉన్నట్టు నిర్వాహక వర్గాలు పేర్కొన్నాయి. ప్రధాని రాకపై ఇంకా స్పష్టత రాలేదు.

36 ఏళ్ల తర్వాత కూడా కశ్మీర్ పండిట్ల హృదయాల్లో కశ్మీర్ ప్రేమ చనిపోలేదని, ఈ కాంక్లేవ్ తమ మాతృభూమితో బంధాన్ని మళ్లీ బలపరుచుకునే ప్రయత్నమని నిర్వాహకులు తెలిపారు.