తుని జ్ఞానేశ్వరి మిస్సింగ్ కేసు: 50 రోజులు గడిచినా ఆచూకి లేదు

కాకినాడ జిల్లా తుని మండలం సిహెచ్ అగ్రహారంలో రెండున్నరేళ్ల జ్ఞానేశ్వరి అదృశ్యమై ఈ రోజుకు 50 రోజులు పూర్తయ్యాయి. జూన్ నెలలో ఇంటి నుంచి బయటకు వెళ్లిన చిన్నారి ఇప్పటివరకు కనిపించలేదు.

చిన్నారి ఆచూకి కోసం పోలీసులు, ఎన్డీఆర్ఎఫ్, ఎస్డీఆర్ఎఫ్ బృందాలు పెద్ద ఎత్తున గాలింపు చర్యలు చేపట్టాయి. డ్రోన్ కెమెరాలు, స్నిఫర్ డాగ్స్, ఏఐ టెక్నాలజీ వినియోగించి అడవులను, వాగులను జల్లెడ పట్టారు. అయినా ఎలాంటి ఆధారం లభించలేదు. పాపతో పాటు వెళ్లిన పెంపుడు కుక్క రెండు రోజుల తర్వాత తిరిగి రాగా, కొన్ని రోజులకు అనారోగ్యంతో మృతి చెందడం దర్యాప్తుకు పెద్ద అడ్డంకిగా మారింది. దానికి జీపీఎస్ ట్రాకర్ అమర్చి ఆచూకి కనుక్కునే ప్రయత్నం ఫలించలేదు.

పోలీసులు ఆ ప్రాంతంలోని మొబైల్ టవర్ డంప్ డేటా, సీసీటీవీ ఫుటేజీ, కాల్ డేటాను విశ్లేషిస్తున్నారు. చైల్డ్ ట్రాఫికింగ్, కిడ్నాప్ కోణంలోనూ దర్యాప్తు చేస్తున్నారు. కానీ ఇప్పటివరకు ఎక్కడా కీలక ఆధారం దొరకలేదు.

ఈ కేసుపై రాష్ట్ర హైకోర్టు స్పందించింది. దర్యాప్తు పురోగతిపై సమగ్ర నివేదిక ఇవ్వాలని పోలీసులను ఆదేశించింది. చిన్నారి కుటుంబం ఆవేదనతో ఎదురుచూస్తోంది. అధికారులు మెగా ఆపరేషన్ కొనసాగిస్తున్నా కేసు మిస్టరీగా మారింది.