తూర్పు గోదావరిలో బెల్లం కసర్లు కనుమరుగవుతున్నాయి

తూర్పు గోదావరి జిల్లాలో సంప్రదాయ బెల్లం తయారీ కేంద్రాల (కసర్ల) సంఖ్య గణనీయంగా తగ్గుతోంది. కూలీల కొరత, పెరిగిన పెట్టుబడి, గిట్టుబాటు ధర లేకపోవడం ఈ పరిశ్రమను ఇబ్బందులకు గురి చేస్తున్నాయి.

బెల్లం తయారీదారులు తీవ్ర సంక్షోభం ఎదుర్కొంటున్నారు. అనుభవం ఉన్న కార్మికులు దొరకట్లేదు. రవాణా ఖర్చులు పెరిగాయి. చెరుకు సాగు లాభదాయకంగా లేకపోవడంతో రైతులు ఇతర పంటల వైపు మళ్లుతున్నారు. దీంతో ముడి పదార్థం కూడా సరిగ్గా లభించడంలేదు.

ఒక బెల్లం తయారీ కేంద్రంలో పని చేస్తున్న కార్మికుడు మాట్లాడుతూ, "రోజుకు మూడు నాలుగు పాకాలు (బ్యాచ్‌లు) ఆడతాం. ఒక్కో పాకానికి 250 కేజీల బెల్లం తయారవుతుంది. కానీ లాభాలు చాలా తక్కువ. మేం ఈ వృత్తినే నమ్ముకుని బతుకుతున్నాం. ప్రభుత్వం బెల్లానికి గిట్టుబాటు ధర కల్పించాలి" అని చెప్పారు.

గతంలో ఏడాది పొడవునా సందడిగా ఉండే ఈ కసర్లు ఇప్పుడు కొన్ని మాత్రమే నడుస్తున్నాయి. చాలా కుటుంబాలు ఇతర వ్యాపారాల్లోకి మారిపోయాయి. నైపుణ్యం ఉన్న కార్మికులు లేకపోవడం, యంత్రాల వినియోగం తక్కువగా ఉండటం ఈ పరిశ్రమకు పెద్ద సవాల్‌గా మారింది.

ఈ పరిశ్రమ నిలిచేందుకు ప్రభుత్వ సహకారం, కార్మికులకు శిక్షణ, ఆధునిక సాంకేతికత అందించాల్సిన అవసరం ఉందని తయారీదారులు కోరుతున్నారు. లేకపోతే ఈ సంప్రదాయ వృత్తి చరిత్ర పుటల్లోనే మిగిలిపోయే ప్రమాదం ఉంది.