గోదావరి పరిరక్షణ: కాలుష్య నియంత్రణకు టాస్క్ ఫోర్స్, రూ.100 కోట్ల నిధులు

రానున్న గోదావరి పుష్కరాలను దృష్టిలో ఉంచుకుని నది కాలుష్య నియంత్రణకు టాస్క్ ఫోర్స్ ఏర్పాటు చేశామని ఏపీ పొల్యూషన్ కంట్రోల్ బోర్డు చైర్మన్ కృష్ణయ్య తెలిపారు. టాస్క్ ఫోర్స్ ఇప్పటికే క్షేత్ర స్థాయిలో పర్యటనలు చేస్తూ కాలుష్య కారణాలను గుర్తిస్తోంది.

రాజమండ్రి పరిసరాల్లో మురుగునీరు, ఘన వ్యర్థాలు నేరుగా గోదావరిలో చేరకుండా నివారించేందుకు అధికారులు ప్రణాళికలు రూపొందిస్తున్నారు. ఇందులో భాగంగా ఎస్టీపీల నిర్మాణాన్ని వేగవంతం చేయాలని, కొత్త ఎస్టీపీల అవసరాన్ని గుర్తించామని కృష్ణయ్య వివరించారు.

ఉప ముఖ్యమంత్రి పవన్ కళ్యాణ్ రూ.100 కోట్ల నిధులు మంజూరు చేసినట్లు తెలిపారు. ఈ నిధులతో మురుగునీటి శుద్ధి ప్రాజెక్టులు, డ్రైనేజీ వ్యవస్థల మెరుగుదల చేపడతామన్నారు. భూసేకరణ సమస్యలు కొన్నిచోట్ల ఉన్నా, ప్రభుత్వం ప్రత్యామ్నాయ మార్గాలు అన్వేషిస్తోందని ఆయన తెలిపారు.

పరిశ్రమల నుంచి వెలువడే కాలుష్యంపైనా దృష్టి పెట్టామని, రాజమండ్రిలోని పేపర్ మిల్ ట్రీట్మెంట్ పై ప్రత్యేకంగా పరిశీలిస్తున్నామని కృష్ణయ్య చెప్పారు. నిబంధనలు ఉల్లంఘించే పరిశ్రమలపై పెనాల్టీలు విధించేందుకు తమ బోర్డుకు అధికారం ఉందని, అవసరమైతే మూసివేత చర్యలు కూడా తీసుకుంటామని హెచ్చరించారు.

రాబోయే ఏడాది లోపు గోదావరి నదిని కాలుష్య రహితంగా తీర్చిద్దామని లక్ష్యంగా పెట్టుకున్నామని, పుష్కరాల నాటికి స్వచ్ఛమైన నీరు అందించేందుకు చిత్తశుద్ధితో పని చేస్తామని కృష్ణయ్య విశ్వాసం వ్యక్తం చేశారు.