గోదావరిలో పులస చేపలు లభ్యం కావడం లేదు: భోజన ప్రియులు, మత్స్యకారులు నిరాశ

ఈ ఏడాది గోదావరి నదిలో పులస చేపలు లభ్యం కావడం లేదు. సాధారణంగా జూలై మొదటి వారంలో సముద్రం నుంచి గోదావరిలోకి వచ్చే పులస ఈసారి వర్షాలు లేకపోవడంతో కనబడట్లేదు.

గత నెలలో యాణంలో ఒక్క పులస మాత్రమే చిక్కింది, అది ₹15,000 ధర పలికింది. తర్వాత ఇప్పటివరకు మరొకటి కనిపించలేదు. దీంతో పులస రుచి కోసం ఎదురుచూస్తున్న భోజన ప్రియులు, మత్స్యకారులు నిరాశ చెందుతున్నారు.

పులసతో చేసే చేపల పులుసు ప్రత్యేకమైనది కావడంతో భోజన ప్రియులు ఎంత ధరనైనా చెల్లించేందుకు సిద్ధంగా ఉన్నారు. కొంతమంది మత్స్యకారులకు అడ్వాన్స్ ఇచ్చి, పులస దొరికిన వెంటనే తెలియజేయమని కోరుతున్నారు. ధరపై రాయితీ అడగబోమని చెబుతున్నారు.

యాణం, కోటిపల్లి, బుడసకుర్రు, గోడితిప్ప, పాసర్లపూడి, పొట్టిలంక, పి గన్నవరం ప్రాంతాల్లో సాధారణంగా పులసలు అమ్ముతారు. కొంతమంది మహిళలు స్థానిక మత్స్యకారుల నుంచి కొని మార్కెట్లో విక్రయిస్తారు. చాలా మంది వీరిని సంప్రదించి అడ్వాన్స్ ఇస్తున్నారు.

మారుతున్న వాతావరణం కారణంగా రెండేళ్లుగా పులస అరకొరగా దొరుకుతుండగా, ఈ ఏడాది ఇప్పటివరకు కేవలం ఒక చేపే లభించింది. మున్ముందు పులస దొరకదేమోనని ఆందోళన వ్యక్తమవుతోంది.