గోదావరి పుష్కరాలకు రాజమహేంద్రవరంలో భూగర్భ విద్యుత్ వ్యవస్థ

వచ్చే ఏడాది జూన్‌లో జరగనున్న గోదావరి మహా పుష్కరాలకు ముందే రాజమహేంద్రవరంలో భూగర్భ విద్యుత్ కేబుల్ పనులు మొదలయ్యాయి. గోదావరి తీరం వెంట 6 కిలోమీటర్ల మేర ఈ వ్యవస్థ ఏర్పాటు చేస్తున్నారు. ₹20 కోట్ల వ్యయంతో ఈ పనులు జరుగుతున్నాయి.

ISKCON టెంపుల్ నుంచి కోటిలింగాల ఘాట్ వరకు గోదావరి తీరం వెంట ఉన్న విద్యుత్ స్తంభాలు, ట్రాన్స్‌ఫార్మర్‌లు తొలగించి వాటి స్థానంలో భూగర్భ కేబుళ్లు వేస్తున్నారు. 33 KV అండర్‌గ్రౌండ్ కేబుల్ ద్వారా రివర్ వ్యూ సబ్‌స్టేషన్, ఆర్యపురం సబ్‌స్టేషన్, కోటిలింగాలపేట సబ్‌స్టేషన్‌లను ఇంటర్‌లింక్ చేస్తున్నారు.

మొత్తం 33 KV లైన్ 19 కిలోమీటర్లు, 11 KV లైన్ 11.5 కిలోమీటర్లు, LT లైన్ 56 కిలోమీటర్లు వేస్తారని అధికారులు తెలిపారు. వేపకాయలదిబ్బ వద్ద కొత్త 220/33 KV సబ్‌స్టేషన్ నిర్మించారు. ఆ సబ్‌స్టేషన్ నుంచి ఎనిమిది కొత్త ఫీడర్‌లను అండర్‌గ్రౌండ్ కేబుళ్ల ద్వారా తీసుకొస్తారు.

భూగర్భ కేబుల్ వల్ల విద్యుత్ అంతరాయాలు గణనీయంగా తగ్గుతాయని అధికారులు వివరించారు. ఓవర్‌హెడ్ లైన్లకు జంతువులు, విషపురుగులు, భవనాల నుంచి వస్తువులు పడటం వంటి కారణాలతో విద్యుత్ పోయే ప్రమాదం ఉంటుందని, భూగర్భ వ్యవస్థలో ఆ సమస్యలు ఉండవని పేర్కొన్నారు.

పుష్కరాలకు 5 కోట్ల మంది భక్తులు వస్తారని అంచనా. పుష్కరాలు ముగిసిన తర్వాత కూడా రాజమహేంద్రవరం మొత్తానికి నిరంతరాయ విద్యుత్ సరఫరా కోసం ఈ వ్యవస్థ ఉపయోగపడుతుందని అధికారులు తెలిపారు.