గోదావరి పుష్కరాలకు తెలుగు రాష్ట్రాల ముందస్తు సన్నాహాలు

గోదావరి పుష్కరాలకు తెలంగాణ, ఆంధ్రప్రదేశ్ ప్రభుత్వాలు ఏర్పాట్లు మొదలుపెట్టాయి. పుష్కరాలు 2027 జూన్ 26న ప్రారంభమై జూలై 7న ముగుస్తాయి.

తెలంగాణ ప్రభుత్వం శాశ్వత మౌలిక సదుపాయాల అభివృద్ధికి ₹1,000 కోట్లు కేటాయించాలని నిర్ణయించింది. తొలి దశలో ₹300 కోట్లు మంజూరు చేస్తూ CM రేవంత్ రెడ్డి అధ్యక్షతన శనివారం జరిగిన కేబినెట్ సమావేశం ఆమోదించింది. పుష్కరాల నిర్వహణకు సంబంధించి శాశ్వత, తాత్కాలిక పనులు కలిపి ₹6,000 కోట్ల విలువైన ప్రతిపాదనలు వచ్చాయి. వివిధ శాఖల అధికారులతో ఏర్పాటైన సాంకేతిక కమిటీ క్షేత్ర స్థాయిలో పర్యటించి ₹1,819 కోట్ల పనులకు గత నెలలో ఆమోదం తెలిపింది.

ఆంధ్రప్రదేశ్ వైపు, డిప్యూటీ CM పవన్ కళ్యాణ్ ఈ రోజు సాయంత్రం రాజమండ్రి వచ్చి పుష్కరాల ఏర్పాట్లను పరిశీలించనున్నారు. మంత్రి కందుల దుర్గేష్ పవన్ కళ్యాణ్ పర్యటన ఏర్పాట్లను ముందే సమీక్షించారు. కాలుష్య రహిత గోదావరి పుష్కరాల నిర్వహణ ప్రభుత్వ లక్ష్యమని కందుల దుర్గేష్ తెలిపారు.