పన్నుల భారంతో బంగారం డిమాండ్ 70% పతనం

దేశంలో బంగారం డిమాండ్ 70% మేర పడిపోయింది. పెరిగిన పన్నులు, ఆకాశాన్నంటిన ధరలు ఈ భారీ తగ్గుదలకు కారణమని వ్యాపారులు తెలిపారు.

కేంద్ర ప్రభుత్వం బంగారం దిగుమతి సుంకాన్ని 6% నుంచి 15%కు పెంచింది. దీనితో పాటు బంగారంపై మొత్తం పన్ను 9.18% నుంచి 18.45%కి పెరిగింది. పెట్రోల్, డీజిల్, నిత్యావసరాల ధరలు పెరగడంతో మధ్యతరగతి కుటుంబాలు బంగారం కొనుగోలును వాయిదా వేస్తున్నాయి.

గతేడాది మే నెలలో 25 టన్నుల బంగారం డిమాండ్ ఉండగా, ఈ ఏడాది మే 13న సుంకాలు పెంచిన తర్వాత వారంలో ఇది 7.5 టన్నులకు పడిపోయింది. ఏడాది పాటు బంగారం కొనుగోలును విరమించుకోవాలని ప్రధాని మోదీ చేసిన విజ్ఞప్తి కూడా మార్కెట్ సెంటిమెంట్‌ను దెబ్బతీసింది.

ప్రస్తుతం ముంబై స్పాట్ మార్కెట్‌లో 10 గ్రాముల స్వచ్ఛమైన బంగారం ధర రూ.1.57 లక్షలుగా ఉంది. ధరలు ఎక్కువగా ఉండటంతో, వినియోగదారులు తమ బడ్జెట్‌కు సరిపడేలా తక్కువ క్యారెట్, తేలికపాటి నగల వైపు మొగ్గు చూపుతున్నారు. ముఖ్యంగా దక్షిణాది రాష్ట్రాల్లో ఈ మార్పు స్పష్టంగా కనిపిస్తోంది.

మరోవైపు, బంగారం ధరలు గరిష్ఠ స్థాయిలో ఉండడాన్ని ఆసరాగా చేసుకుని, పాత నగలను అమ్ముకుని నగదు పొందడానికి జనం జ్యువెలరీ షాపుల వద్ద క్యూలు కడుతున్నారు.