ఇరాన్-అమెరికా ఉద్రిక్తతలతో బంగారం ధర తగ్గింది; దేశీయ మార్కెట్‌పై విశ్లేషణ

ఇరాన్-అమెరికా మధ్య ఉద్రిక్తతలు పెరగడంతో శనివారం ఉదయం బంగారం ధరలు తగ్గాయి. హార్మజ్ జలసంధిలో సముద్ర మైన్లు పేలడంతో రెండు చమురు ట్యాంకర్లకు నష్టం జరిగింది. దీని ప్రభావంతో బ్రెంట్ క్రూడ్ చమురు ధర రాత్రి 4.5% పెరిగి 88.10 డాలర్లకు చేరింది.

గత పది రోజుల్లో బ్రెంట్ చమురు ధర 72 డాలర్ల నుంచి 88 డాలర్ల దాకా పెరిగింది. శుక్రవారం ఆసియా, యూరప్, అమెరికా మార్కెట్లు నష్టాల్లో ముగిశాయి. కానీ భారత స్టాక్ మార్కెట్ లాభాల్లో కొనసాగింది. ఐటీ, బ్యాంకింగ్ రంగాల్లో విలువ కొనుగోళ్లు, త్రైమాసిక ఫలితాల ప్రభావంతో మార్కెట్ పెరిగింది.

మార్కెట్ విశ్లేషకుడు జి.వి. సత్యనారాయణ మాట్లాడుతూ, బ్రెంట్ ధర మరింత పెరిగితే సోమవారం దేశీయ మార్కెట్లు గ్యాప్ డౌన్తో ప్రారంభమవుతాయని, బంగారం, వెండి ధరలు తగ్గవచ్చని అంచనా వేశారు. యుద్ధం కొనసాగితే దేశాల ఆర్థిక వ్యవస్థలు మందగించి, బంగారంపై పెట్టుబడులు తగ్గిపోయే అవకాశం ఉందని వివరించారు.

పెట్టుబడిదారులు దీర్ఘకాలిక దృక్పథంతో నిర్ణయాలు తీసుకోవాలని, షార్ట్ టర్మ్ లావాదేవీలు ప్రమాదకరమని సూచించారు. అలాగే, బంగారు నగలు కొనుగోలు చేసేటప్పుడు షాపుల ప్రకటనల్లో పారదర్శకత ఉండదని, ఎస్టీమేషన్లలో తేడాలు ఉంటాయని హెచ్చరించారు. బ్రెంట్ ధర తగ్గడం, ఇరాన్-అమెరికా వివాదం సద్దుమణిగిన తర్వాతే మార్కెట్లలో స్థిరత్వం వస్తుందని తెలిపారు.