జొన్నగిరి బంగారు ఉత్పత్తి కేంద్రం ప్రారంభం; సీఎం చంద్రబాబు ప్రారంభోత్సవం

కర్నూలు జిల్లా తుగ్గలి మండలం జొన్నగిరిలోని జియో మైసూర్ సర్వీసెస్ ప్రైవేట్ లిమిటెడ్ కంపెనీ బంగారు ఉత్పత్తి కేంద్రం రేపు ప్రారంభం కానుంది. ముఖ్యమంత్రి చంద్రబాబు నాయుడు ఉదయం 11:30 గంటలకు హెలికాప్టర్‌లో చేరుకుని ప్లాంట్‌ను ప్రారంభించనున్నారు.

ఆస్ట్రేలియాకు చెందిన ఈ కంపెనీ 2006లో కేంద్ర ప్రభుత్వం నుంచి అనుమతులు పొంది, 20 ఏళ్ల పాటు ఇక్కడ సర్వే, తవ్వకాలు నిర్వహించింది. 1994లో జియోలాజికల్ సర్వే ఆఫ్ ఇండియా ఈ ప్రాంతంలో బంగారు, వజ్రాల నిక్షేపాలున్నట్లు గుర్తించి నివేదిక ఇచ్చింది. 1477 ఎకరాల విస్తీర్ణంలో రూ.320 కోట్ల అంచనా వ్యయంతో ఈ మైనింగ్ ప్లాంట్‌ను ఏర్పాటు చేశారు.

కంపెనీ ప్రతినిధుల ప్రకారం, తొలి సంవత్సరం (2026-27) 600 కిలోల బంగారాన్ని ఉత్పత్తి చేసి, వచ్చే ఏడాది 1500 కిలోలకు పెంచి, సగటున ఏటా 1000 కిలోల ఉత్పత్తి లక్ష్యంగా పెట్టుకున్నారు. ప్రస్తుతం ఓపెన్ కాస్ట్ మైనింగ్ ద్వారా భూమి ఉపరితలం నుంచి 180 మీటర్ల లోతు వరకు తవ్వకాలు జరుగుతున్నాయి. శుద్ధి చేసిన బంగారం 86% స్వచ్ఛతతో ఉందని జిల్లా కలెక్టర్ సిరి తెలిపారు.

జొన్నగిరి తర్వాత అనంతపురం జిల్లా రామగిరి, చిత్తూరు జిల్లాల్లో కూడా గోల్డ్ మైనింగ్‌కు ప్రభుత్వం అనుమతులు ఇవ్వనున్నట్లు అధికార వర్గాలు సూచించాయి. స్వాతంత్య్రం తర్వాత భారత్‌లో ఇదే తొలి ప్రైవేట్ బంగారు గని. ఇక్కడి నుంచి దేశానికి సరఫరా పెరిగితే, బంగారు దిగుమతులపై ఆధారపడటం తగ్గుతుందని అధికారులు భావిస్తున్నారు. రేపు జరిగే బహిరంగ సభలో ముఖ్యమంత్రి ప్రసంగించనున్నారు.