దిశా చట్టం రద్దు నిర్ణయంపై జగన్ మోహన్ రెడ్డి తీవ్ర విమర్శ

వైఎస్ఆర్ కాంగ్రెస్ పార్టీ అధినేత, మాజీ ముఖ్యమంత్రి జగన్ మోహన్ రెడ్డి రాష్ట్ర ప్రభుత్వం దిశా చట్టాన్ని రద్దు చేసిన నిర్ణయంపై తీవ్ర అసంతృప్తి వ్యక్తం చేశారు. మహిళలు, చిన్నారుల భద్రతకు అండగా నిలిచే దిశా వ్యవస్థను రాజకీయ ఈర్షతో రద్దు చేయడం దురదృష్టకరమని ఆయన ఎక్స్ (ట్విట్టర్) వేదికగా పేర్కొన్నారు.

"దిశా చట్టం లేకపోతే రాష్ట్రంలో మహిళల భద్రత ఎలా?" అని ప్రశ్నించిన జగన్, మహిళలు, చిన్నారులపై పెరుగుతున్న నేరాలు, దర్యాప్తు జాప్యం, న్యాయ ప్రక్రియలో ఆలస్యం వంటి సమస్యలను పరిష్కరించేందుకే తమ ప్రభుత్వం దిశా చట్టాన్ని తీసుకొచ్చిందని వివరించారు.

దిశ యాప్ లో ఎస్వీఎస్ బటన్ ద్వారా నిమిషాల్లో పోలీసులు స్పందించే విధానం రూపొందించామని ఆయన తెలిపారు. 1.51 కోట్ల మంది ఈ యాప్ డౌన్లోడ్ చేసుకున్నారని, దాని ద్వారా వచ్చిన 31,607 అత్యవసర కాల్స్‌ను పరిష్కరించామని చెప్పారు. 18 ప్రత్యేక మహిళా పోలీస్ స్టేషన్లు, గ్రామ వార్డు సచివాలయాల్లో 13,500 మంది మహిళా పోలీసులతో భద్రతా వ్యవస్థ ఏర్పాటు చేసినట్టు వివరించారు.

ప్రభుత్వం వెంటనే దిశా చట్టం రద్దు నిర్ణయాన్ని వెనక్కి తీసుకోవాలని జగన్ డిమాండ్ చేశారు. ఈ విషయంపై రాష్ట్ర ప్రభుత్వం స్పందించాల్సి ఉంది.