ముడి చమురు ధరలు భారీగా పడిపోవడంతో బంగారం, వెండి ధరలు పెరిగాయి

ఇవాళ దేశీయ మార్కెట్‌లో బంగారం, వెండి ధరలు గణనీయంగా పెరిగాయి. 24 క్యారట్ల 10 గ్రాముల బంగారం ధర రూ.1,100 పెరిగింది. కిలో వెండి ధర రూ.2,800 పెరిగింది. సెన్సెక్స్ 900 పాయింట్లు, నిఫ్టీ 250 పాయింట్ల లాభంతో ట్రేడ్ అవుతున్నాయి.

అమెరికా అధ్యక్షుడు ట్రంప్ ఇరాన్ తో అణు ఒప్పందం కుదరబోతోందని ప్రకటించడంతో అంతర్జాతీయ మార్కెట్లో ముడి చమురు (బ్రెంట్) ధర 3.6% తగ్గి బ్యారెల్‌కు 89.73 డాలర్లకు చేరింది. ఇదే సమయంలో ఇరాన్ విదేశాంగ మంత్రిత్వ శాఖ ప్రతినిధి ఇస్మాయిల్ బగాయి మాత్రం ఇంకా ఎలాంటి నిర్ణయం తీసుకోలేదని చెప్పారు.

సీనియర్ మార్కెట్ విశ్లేషకుడు జీవీ సత్యనారాయణ మాట్లాడుతూ, ముడి చమురు ధరలు తగ్గడంతో భారత దిగుమతి భారం తగ్గుతుందని, రూపాయి బలోపేతమయ్యే అవకాశం ఉందన్నారు. పెయింట్స్, కెమికల్స్, టైర్లు, ఏవియేషన్, చమురు మార్కెటింగ్ కంపెనీలకు ఇది సానుకూలంగా ఉంటుందని వివరించారు. అంతేకాకుండా, అమెరికా ఫెడరల్ రిజర్వ్ వడ్డీ రేట్లు తగ్గించే అవకాశాలు పెరగడంతో బంగారం, వెండికి సురక్షిత పెట్టుబడిగా డిమాండ్ పెరిగిందని తెలిపారు.

మార్కెట్ ధోరణి ఇప్పుడు బ్రెంట్ క్రూడ్ ధరలపైనే ఆధారపడి ఉంటుందని, ఇన్వెస్టర్లు ఆయా రంగాల షేర్లపై దృష్టి పెట్టాలని సత్యనారాయణ సూచించారు. సెన్సెక్స్ ఇవాళ 74,859 వరకు ఇంట్రాడే గరిష్టాన్ని తాకింది, 26 కంపెనీలు లాభాల్లో కొనసాగుతున్నాయి.