భోగాపురంలో ప్రధాని మోదీ పర్యటనకు విద్యుత్ శాఖ సన్నద్ధం: మంత్రి గొట్టిపాటి రవికుమార్ సమీక్ష

ప్రధానమంత్రి నరేంద్ర మోదీ భోగాపురం పర్యటన నేపథ్యంలో, విద్యుత్ శాఖ మంత్రి గొట్టిపాటి రవికుమార్ EPDCL అధికారులతో సమీక్ష నిర్వహించారు. ఈ సందర్భంగా విద్యుత్ సరఫరాలో ఎలాంటి అంతరాయాలు లేకుండా చూడాలని, అవసరమైతే అదనపు సిబ్బందిని రంగంలోకి దింపాలని మంత్రి ఆదేశించారు.

ప్రధానమంత్రి సూర్యఘర్, కుసుం పథకాల పనులను వేగవంతం చేయాలని మంత్రి సూచించారు. అధికారులు సమావేశంలో తెలిపిన వివరాల ప్రకారం, PM కుసుం RDSS పనులు డిసెంబర్ నాటికి పూర్తవుతాయి. RDSS పనుల వల్ల డిస్కం పై ఆర్థిక భారం 100 కోట్లకు పైగా తగ్గిందని వారు తెలిపారు.

విద్యుత్ నష్టాలను నివారించేందుకు భూగర్భ కేబుళ్లు వేస్తున్నామని అధికారులు మంత్రికి వివరించారు. శ్రీకాకుళం, విశాఖపట్నం, అనకాపల్లి, తూర్పు గోదావరి జిల్లాల్లో ఈ పనులు కొనసాగుతున్నాయి.

వచ్చే గోదావరి పుష్కరాలకు విద్యుత్ శాఖ సమాయత్తంగా ఉండాలని గొట్టిపాటి ఆదేశించారు. మార్చి 2027 నాటికి పుష్కరాలకు సంబంధించిన పనులు పూర్తి కావాలని తెలిపారు. ఈ మేరకు కొత్తగా 19 సబ్‌స్టేషన్‌లను సిద్ధం చేస్తున్నట్లు అధికారులు వెల్లడించారు.

విద్యుత్ శాఖలో ఉద్యోగాలు ఇప్పిస్తామంటూ డబ్బులు వసూలు చేసే దలాలులను నమ్మి మోసపోవద్దని మంత్రి హెచ్చరించారు. మెరిట్ ప్రాతిపదికనే నియామకాలు జరుగుతున్నాయని, ఇప్పటివరకు 450 మందికి కారుణ్య నియామకాలు కల్పించినట్లు తెలిపారు.