గుడివాడ ఆలయం బంగారు కిరీటం మాయం: ట్రస్ట్ అధ్యక్షుడిపై కేసు నమోదు

కృష్ణా జిల్లా గుడివాడలోని శ్రీ కళ్యాణ వెంకటేశ్వర స్వామి ఆలయంలో ₹1 కోటి విలువైన బంగారు కిరీటం మాయమైంది. ఆలయ ట్రస్ట్ అధ్యక్షుడు మోహన్‌రావుపై మూడు సెక్షన్ల కింద కేసు నమోదు చేశారు.

భక్తుడు సుబ్బారావు తన కుటుంబంతో కలిసి మొక్కు చెల్లించడానికి ఈ కిరీటాన్ని తయారు చేయించి ఆలయానికి సమర్పించారు. ఆ సమయంలో సుమారు 30 మంది ట్రస్ట్ సభ్యులు కిరీటాన్ని స్వీకరించారు. కానీ తర్వాత కిరీటాన్ని స్వామివారికి అలంకరించడం లేదని సుబ్బారావు గమనించారు.

నెల రోజుల పాటు ట్రస్ట్ అధ్యక్షుడు మోహన్‌రావును అడిగినా స్పందన రాలేదు. పరుమాల్ పోలీస్ స్టేషన్‌లో ఫిర్యాదు చేసినప్పుడు పోలీసులు పట్టించుకోలేదని సుబ్బారావు మీడియా ముందుకు వచ్చి చెప్పారు.

కిరీటం గుడివాడ సెంటర్‌లో ఉన్న ఒక షాపులో ₹38 లక్షలకు తాకట్టు పెట్టినట్లు తెలుస్తోంది. ఒక కిరీటమే కాదు, ఆలయానికి సమర్పించిన అనేక నగలు మరియు నిధులు కూడా మిస్‌అయ్యాయని ఆరోపణలు వస్తున్నాయి.

దేవాదాయ శాఖ అసిస్టెంట్ కమిషనర్ లలిత ఆలయానికి వెళ్లి ప్రాథమిక విచారణ పూర్తి చేశారు. అర్చకులు, దాతలు, భక్తుల నుండి స్టేట్‌మెంట్లు తీసుకున్నట్లు ఆమె తెలిపారు. అయితే ట్రస్ట్ కమిటీ సభ్యులు 30 మంది అందుబాటులో లేరని, రికార్డులు ఉన్న గదులకు తాళాలు వేసి వెళ్ళిపోయారని లలిత వెల్లడించారు.

ఈ ఆలయం నాలుగు దశాబ్దాల క్రితం నిర్మించినప్పటికీ ఇప్పటివరకూ ఎండోమెంట్ పరిధిలోకి రాలేదు. ప్రభుత్వం ఈ ఆలయాన్ని ఎండోమెంట్ పరిధిలోకి తీసుకోవాలని భక్తులు డిమాండ్ చేస్తున్నారు. దేవాదాయ శాఖ త్వరలో ప్రభుత్వానికి నివేదిక సమర్పించనుంది.