ఆపిల్ వ్యర్థాలతో వీగన్ లెదర్: గుజరాత్ యువ పారిశ్రామికవేత్త వినూత్న ప్రయోగం

గుజరాత్‌లోని సూరత్‌కు చెందిన ఒక యువ పారిశ్రామికవేత్త జంతువుల చర్మాన్ని వాడకుండా, ఆపిల్ పండ్ల వ్యర్థాలతో లెదర్ తయారు చేస్తున్నారు. హిమాచల్ ప్రదేశ్‌లోని సిమ్లా, కాశ్మీర్ ప్రాంతాల నుండి పాడైపోయిన ఆపిల్‌లను సేకరించి, వాటిని మెషీన్లలో పిప్పిగా మార్చి, ఎండబెట్టి, పౌడర్లు మరియు రసాయనాలు కలిపి లెదర్ తయారు చేస్తున్నారు.

సూరత్‌లోని కోటెడ్ టెక్స్టైల్ ఇండస్ట్రీతో అనుసంధానమై ఈ తయారీ జరుగుతోంది. ఈ లెదర్‌తో చెప్పులు, బూట్లు, బ్యాగులు, పర్సులు, బెల్ట్లు తయారు చేస్తున్నారు.

జంతువుల చర్మంతో తయారు చేసే సాంప్రదాయిక లెదర్ కంటే ఈ ఉత్పత్తి ధర తక్కువగా ఉంటుందని పేర్కొంటున్నారు. ఆపిల్ రైతులకు పాడైన పండ్లను వ్యర్థంగా పడేయకుండా అమ్మే అవకాశం దక్కడం, వినియోగదారులకు తక్కువ ధరకు లెదర్ వస్తువులు అందుబాటులోకి రావడం — ఈ రెండు వర్గాలకూ ప్రయోజనం కలుగుతుందని తెలిపారు.