మహిళల భద్రత కోసం గుంటూరు పోలీసులు 'అభయ ఆటో గుంటూరు' యాప్ ప్రారంభం

గుంటూరు నగరంలో ఆటో ప్రయాణాలను సురక్షితం చేసేందుకు పోలీసులు 'అభయ ఆటో గుంటూరు' మొబైల్ యాప్ను అందుబాటులోకి తెచ్చారు. ముఖ్యంగా మహిళలు, పిల్లల భద్రత కోసం ఈ యాప్ రూపొందించారు.

ఈ యాప్ ద్వారా ప్రయాణికులు ఆటోలో అమర్చిన QR కోడ్ను స్కాన్ చేసి, డ్రైవర్ పూర్తి వివరాలు పొందవచ్చు. డ్రైవర్ పేరు, ఫోన్ నంబర్, చిరునామా, ఆధార్ కార్డు, లైసెన్స్ నంబర్ వంటివి కూడా కనిపిస్తాయి.

ఆటోలో ప్రయాణిస్తున్నప్పుడు దారి మారితే లేదా ఏదైనా ఇబ్బంది ఎదురైతే, యాప్ లో ఉన్న SOS బటన్ నొక్కిన వెంటనే పోలీస్ కంట్రోల్ రూమ్కు సమాచారం వెళ్తుంది. దగ్గరలోని పోలీస్ బృందాన్ని అప్రమత్తం చేసి, వెంటనే సహాయం పొందవచ్చు. అలాగే, ప్రయాణ వివరాలను స్నేహితులు, కుటుంబ సభ్యులతో షేర్ చేసుకోవచ్చు.

ఈ యాప్లో మరో ఉపయోగకరమైన ఫీచర్ ఏమిటంటే, ఆటోలో వస్తువులు మరచిపోతే డ్రైవర్ను సంప్రదించి తిరిగి పొందవచ్చు.

గుంటూరు నగరంలో 16,200కు పైగా ఆటోలకు పోలీసులు డిజిటల్ నంబర్ ఇచ్చి, QR కోడ్ స్టిక్కర్లు అతికించారు. ఈ అధికారిక నంబర్ ఉన్న ఆటోలను మాత్రమే ఎక్కాలని, మిగతా ఆటోలను ఎక్కవద్దని పోలీసులు సూచిస్తున్నారు.

యాప్పై ప్రజలకు అవగాహన కల్పించేందుకు డిగ్రీ కాలేజీలు, ఇంజనీరింగ్ కాలేజీలు, షాపింగ్ మాల్స్ వద్ద ప్రచార కార్యక్రమాలు నిర్వహిస్తున్నారు. పోలీస్ సిబ్బంది రోడ్డుపై ప్రయాణికులకు వివరించి, యాప్ డౌన్లోడ్ చేయించే ప్రయత్నం చేస్తున్నారు.

ప్రయాణికుల భద్రతే లక్ష్యంగా పోలీసులు ఈ యాప్ను తీసుకొచ్చినట్లు డీఎస్పీ బి శ్రీనివాస్, ట్రాఫిక్ సీఐ అశోక్ తెలిపారు. ప్రతి ఒక్కరూ ఈ యాప్ డౌన్లోడ్ చేసుకొని, సురక్షితమైన ప్రయాణం చేయాలని వారు విజ్ఞప్తి చేశారు.