గుంటూరులో పొగాకు రైతుల ర్యాలీ; మద్దతు ధర డిమాండ్, బోర్డు ముట్టడికి హెచ్చరిక

గుంటూరు జిల్లాలో పొగాకు రైతులు మద్దతు ధర కల్పించాలని కోరుతూ ర్యాలీ నిర్వహించారు. ఈ ర్యాలీ చుట్టుగుంట నుండి పొగాకు బోర్డు కార్యాలయం వరకు సాగింది.

మాజీ ఎంపీ వడ్డే శోభనాద్రీశ్వరరావు ఈ ర్యాలీలో పాల్గొన్నారు. వర్జినియా పొగాకుకు గత రెండేళ్లలో మంచి ధరలు రావడంతో సాగు విస్తీర్ణం పెరిగిందని ఆయన తెలిపారు. కానీ ప్రస్తుతం కొనుగోలు కంపెనీలు ముందుకు రావడం లేదని, దాంతో రైతులు ఇబ్బంది పడుతున్నారని చెప్పారు.

పొగాకు బోర్డు ద్వారా కొనుగోలు చేసేందుకు కేంద్ర ప్రభుత్వం 500 కోట్లు కేటాయించాలని డిమాండ్ చేశారు. రాష్ట్ర ప్రభుత్వం కూడా 500 కోట్లు విడుదల చేయాలని ఆయన కోరారు. ఆక్షన్ సెంటర్ల నిర్వహణ సరిగా లేదని, కొనుగోలు ప్రక్రియ మందగించిందని రైతులు ఆరోపిస్తున్నారు.

కేంద్ర, రాష్ట్ర ప్రభుత్వాలకు గత రెండు నెలలుగా విన్నవించినా స్పందన లేదని, దీంతో పొగాకు బోర్డు కార్యాలయం ముట్టడించేందుకు సిద్ధమని వడ్డే శోభనాద్రీశ్వరరావు హెచ్చరించారు.