నాగర్కర్నూల్‌లో మాజీ ఎమ్మెల్యే గువ్వల బాలరాజు అరెస్ట్

నాగర్కర్నూల్ జిల్లాలో మాజీ ఎమ్మెల్యే, బీజేపీ నేత గువ్వల బాలరాజు అరెస్ట్ అయ్యారు. వెల్లండ మండలం కొట్ర గేట్ వద్ద పోలీసులు ఆయనను అదుపులోకి తీసుకున్నారు. లింగాల మండలంలో పండగ సాయన్న విగ్రహాన్ని తొలగించిన నేపథ్యంలో సంఘీభావం తెలపడానికి ఆయన వెళ్తుండగా ఈ అరెస్ట్ జరిగింది.

అరెస్ట్ సమయంలో పోలీసులతో గువ్వల బాలరాజు వాగ్వాదం జరిగింది. తనను అక్రమంగా అరెస్ట్ చేస్తున్నారని ఆయన ప్రభుత్వంపై ఆగ్రహం వ్యక్తం చేశారు. మాజీ ఎమ్మెల్యేగా తనకు హక్కులు, నిబంధనలు తెలుసునని, ఎస్పీతో మాట్లాడే అవకాశం కల్పించాలని ఆయన డిమాండ్ చేశారు.

గువ్వల బాలరాజు అరెస్ట్ వార్త తెలియగానే పెద్ద సంఖ్యలో బీజేపీ కార్యకర్తలు ఊర్కొండ పోలీస్ స్టేషన్ వద్దకు చేరుకున్నారు. అరెస్ట్ అక్రమమని, వెంటనే విడుదల చేయాలని నినాదాలు చేస్తూ ఆందోళనకు దిగారు. కాంగ్రెస్ ప్రభుత్వం తమ నాయకుడిని కావాలని వేధిస్తోందని వారు ఆరోపించారు. దీంతో పోలీస్ స్టేషన్ ముందు ఉద్రిక్తత నెలకొంది.

పోలీసులు మాత్రం అరెస్ట్ కారణాలపై ఎలాంటి ప్రకటన చేయలేదు. ఈ విషయంపై అధికారిక స్పందన తెలియాల్సి ఉంది.