విశాఖలో రోజుకు 400 MLD నీటి సరఫరా: జీవీఎంసీ చీఫ్ ఇంజనీర్

విశాఖపట్నం, ఏపీ: విశాఖ నగరంలో తాగునీటి సరఫరా పరిస్థితిపై GVMC చీఫ్ ఇంజనీర్ సత్యనారాయణ రాజు వివరాలు తెలిపారు. నగరానికి ప్రతిరోజూ సుమారు 400 MLD నీటిని అందిస్తున్నట్లు ఆయన చెప్పారు. నిన్న కూడా 400 MLD కంటే ఎక్కువ సరఫరా చేశారని తెలిపారు.

గత రెండు రోజుల నుంచి డైలీ డెలివరీ ట్యాంకర్ల ద్వారా నీటిని పంపిణీ చేస్తున్నారు. వర్షాలు లేకపోవడంతో బోర్లు ఎండిపోయి, GVMC నీటిపై ఆధారపడే వారి సంఖ్య పెరిగింది. ప్రైవేట్ ట్యాంకర్ ఓనర్లు ధరలు పెంచడంతో, GVMC సంస్థ 100 ట్యాంకర్లను ఏర్పాటు చేసి, ప్రతిరోజూ దాదాపు 400 ట్రిప్పులు నడిపిస్తోంది. ప్రజలు ఫోన్ ద్వారా బుక్ చేసుకుంటే 1 నుంచి 3 గంటల్లో ట్యాంకర్ వస్తుందని చీఫ్ ఇంజనీర్ తెలిపారు. అయితే కొన్ని ఇరుకు రోడ్లలో పెద్ద ట్యాంకర్ వెళ్లలేకపోవడం, ట్యాంక్ సామర్థ్యం సరిపోకపోవడం వంటి సమస్యలు ఉన్నాయన్నారు. వర్షం పడితే బుకింగ్లు క్యాన్సిల్ చేసుకోవడం కూడా జరుగుతుంది.

విశాఖకు ప్రధాన నీటి వనరులు ఐదు ఉన్నాయి. గోదావరి యేలేరు నుంచి పంపింగ్ చేస్తున్నారు, పురుషోత్తపట్టం నుంచి కూడా సరఫరా చేస్తున్నారు. నగర అవసరాల్లో 60% గోదావరి నీటిపైనే ఆధారపడి ఉంది. యేలేరు లెవల్ ఇంకా పెరుగుతుందని చెప్పారు. లీకేజీలను వెంటనే రిపేర్ చేస్తామని, అందుకు మెయింటెనెన్స్ కాంట్రాక్టులు ఉన్నాయని చీఫ్ ఇంజనీర్ పేర్కొన్నారు. పరిశ్రమలకు నీటి సరఫరాలో ప్రస్తుతం 10 శాతం నుండి 20 శాతం వరకు తగ్గింపు విధించినట్లు తెలిపారు. WALTA చట్టం ప్రకారం బోర్లు వేసుకోవడానికి రెవెన్యూ శాఖ అనుమతి అవసరమని, ఈ విషయంలో GVMC బాధ్యత కాదన్నారు. మొత్తంగా విశాఖ నీటి సరఫరాలో ఎలాంటి ఇబ్బంది లేదని సత్యనారాయణ రాజు స్పష్టం చేశారు.