హనుమకొండలో ప్రైవేట్ స్కూల్ బస్సుల ఫిట్నెస్ తనిఖీలు

వేసవి సెలవుల తర్వాత స్కూళ్లు తిరిగి ప్రారంభం కానున్న నేపథ్యంలో, హనుమకొండ జిల్లాలో రవాణా శాఖ అధికారులు ప్రైవేట్ స్కూళ్ల బస్సుల ఫిట్నెస్ పరీక్షలు చేపట్టారు. జిల్లాలో మొత్తం 900 కు పైగా ప్రైవేట్ స్కూల్ వాహనాలు ఉండగా, ఇప్పటివరకు 600 పైగా బస్సుల తనిఖీ పూర్తయినట్లు అధికారులు తెలిపారు. మిగిలిన 300 బస్సులను కూడా దశల వారీగా తనిఖీ చేస్తున్నారు.

అధికారులు ప్రతి బస్సును స్వయంగా నడిపి, బ్రేక్ కండిషన్, ఎమర్జెన్సీ ఎగ్జిట్, ఫస్ట్ ఎయిడ్ కిట్, ఫైర్ సిలిండర్ వంటి భద్రతా సదుపాయాలను క్షుణ్ణంగా పరిశీలిస్తున్నారు. విద్యార్థుల సౌలభ్యం కోసం స్కూలు బస్సులో మొదటి మెట్టు ఎత్తు కనీసం 325 మిమీ ఉండాలని, హ్యాండ్ గ్రిల్స్ తప్పనిసరి అని అధికారులు స్పష్టం చేశారు.

డ్రైవర్ వయసు 60 ఏళ్ల లోపు ఉండాలనీ, అదే తరగతి వాహనంలో కనీసం ఐదేళ్ల అనుభవం ఉండాలనీ నిబంధనలున్నాయి. పిల్లలు ఎక్కేటప్పుడు, దిగేటప్పుడు సహాయం చేసేందుకు ఒక అటెండెంట్ కూడా తప్పనిసరి అని చెప్పారు. 14-15 ఏళ్లకు పైబడిన బస్సులను స్కూలు బస్సుగా అనుమతించబోమని హెచ్చరించారు. ఫిట్నెస్ లేని బస్సులు రోడ్లపై కనిపిస్తే సీజ్ చేయడంతో పాటు స్కూలు యాజమాన్యంపై కూడా చర్యలు తీసుకుంటామని తెలిపారు.

రోడ్డుపై అదనపు నిఘా ఏర్పాటు చేశామని, ఓవర్‌లోడింగ్ జరుగుతుందో లేదో తనిఖీ చేస్తున్నామని అధికారులు వివరించారు. ఆటోల్లో చిన్నారులను పరిమితికి మించి ఎక్కించడం తీవ్ర ప్రమాదకరమని, తల్లిదండ్రులు అప్రమత్తంగా ఉండాలని సూచించారు. కొద్దిపాటి డబ్బు ఆదా కోసం పిల్లల భవిష్యత్తును ప్రమాదంలో పడవద్దని రవాణా శాఖ అధికారులు విజ్ఞప్తి చేశారు.

స్కూళ్లు ప్రారంభమయ్యే ముందే అన్ని బస్సుల ఫిట్నెస్ పరీక్షలు పూర్తి చేయాలని లక్ష్యంగా పెట్టుకున్నామని, ప్రైవేటు స్కూల్ యాజమాన్యాలు కూడా సహకరించాలని అధికారులు కోరారు.