పెట్రోల్, డీజిల్ ధరలు పెరగాల్సినంతగా పెరగలేదు: కేంద్ర మంత్రి హర్దీప్ సింగ్ పూరి

అంతర్జాతీయ మార్కెట్లో ముడి చమురు ధరలు తీవ్ర హెచ్చుతగ్గులకు లోనవుతున్నా, దేశంలో పెట్రోల్, డీజిల్ ధరలు పెరగాల్సినంతగా పెరగలేదని కేంద్ర పెట్రోలియం, సహజ వాయు శాఖ మంత్రి హర్దీప్ సింగ్ పూరి అన్నారు.

ఉత్తరప్రదేశ్ లోని సోన్భద్ర జిల్లాలో పర్యటించిన సందర్భంగా ఆయన మీడియాతో మాట్లాడారు. 2021-22 తర్వాత ఇటీవల ప్రధాని నరేంద్ర మోదీ మరోసారి కేంద్ర ఎక్సైజ్ సుంకం తగ్గించారని గుర్తుచేశారు. ఈ పన్ను తగ్గింపు వల్ల లీటర్ పెట్రోల్, డీజిల్‌పై ప్రభుత్వం సుమారు ₹10 భారం మోస్తోందని వివరించారు.

దీంతో ధరల మొత్తం పెరుగుదల ₹7.60కే పరిమితమైందని పూరి తెలిపారు. పశ్చిమాసియా సంక్షోభం కారణంగా చమురు మార్కెటింగ్ కంపెనీలు రోజుకు ₹1000 కోట్ల నష్టాన్ని చవిచూశాయని, అయినా ఆ భారాన్ని వినియోగదారులపై మోపలేదని చెప్పారు.

ప్రస్తుతం చమురు సంస్థల వద్ద అధిక ధరలకు కొనుగోలు చేసిన ముడి చమురు నిల్వలు ఉన్నాయని, భవిష్యత్తులో తక్కువ ధరకు కొనుగోలు చేసిన ముడి చమురు రిఫైనరీలకు చేరితే దేశీయ ఇంధన ధరలు తగ్గే అవకాశం ఉందని ఆయన సూచించారు.