24 గంటల ఉచిత విద్యుత్ ఇస్తేనే ఓట్లు అడుగుతానని చెప్పాలి: హరీష్ రావు సవాల్

బీఆర్ఎస్ నేత హరీష్ రావు ముఖ్యమంత్రి రేవంత్ రెడ్డిని సవాల్ చేశారు. 24 గంటల ఉచిత విద్యుత్‌ రాష్ట్ర రైతాంగానికి ఇస్తేనే ఓట్లు అడుగుతానని చెప్పాలని డిమాండ్ చేశారు. సిద్దిపేటలో జరిగిన ఓ సభలో ఆయన మాట్లాడుతూ, కొత్తగా ఏర్పాటు చేయనున్న ఆర్పీడీసీఎల్‌ (రూరల్ పవర్ డిస్ట్రిబ్యూషన్ కంపెనీ) వల్ల రైతులకు రోజుకు 8 నుంచి 9 గంటల విద్యుత్ మాత్రమే లభిస్తుందని ఆరోపించారు.

ఈ కొత్త డిస్కాం‌కు సోలార్ విద్యుత్ మాత్రమే కేటాయిస్తారని, సాయంత్రం 5-6 గంటల తర్వాత విద్యుత్ సరఫరా ఉండదని హరీష్ రావు వివరించారు. ప్రస్తుతం రైతులకు రోజుకు 13 గంటలకు మించి ఉచిత విద్యుత్ రావడం లేదని, కేసీఆర్ ప్రభుత్వ హయాంలో ఇచ్చిన 24 గంటల ఉచిత విద్యుత్‌ను కాంగ్రెస్ ప్రభుత్వం తగ్గించిందని విమర్శించారు.

రైతు కమిషన్ చైర్మన్ కోదన్ రెడ్డి ఈఆర్సీ ముందు రైతులకు 3 గంటల విద్యుత్ చాలని వాదనలు వినిపించారని హరీష్ రావు గుర్తు చేశారు. ప్రభుత్వం జారీ చేసిన జీవో నెంబర్ 8లో రెన్యూవబుల్ ఎనర్జీని ఆర్పీడీసీఎల్‌కు అధికంగా కేటాయించాలని ఉందని, దీనివల్ల లిఫ్ట్ ఇరిగేషన్ ప్రాజెక్టులకు కూడా తీవ్ర ఇబ్బందులు తలెత్తుతాయని ఆయన ఆందోళన వ్యక్తం చేశారు. ఈ విషయమై ముఖ్యమంత్రి రేవంత్ రెడ్డి లేదా ప్రభుత్వం నుంచి ఇప్పటివరకు స్పందన లేదు.