POCSO కేసులు, నేరాల పెరుగుదలపై కాంగ్రెస్ ప్రభుత్వాన్ని హరీష్ రావు నిలదీశారు

బీఆర్ఎస్ నేత హరీష్ రావు తెలంగాణలో చిన్నారులపై లైంగిక దాడులు, శాంతి భద్రతలపై కాంగ్రెస్ ప్రభుత్వాన్ని తీవ్రంగా విమర్శించారు. NCRB డేటాను ఉటంకిస్తూ, 2024లో 2,200 POCSO కేసులు నమోదు కాగా, 2025లో ఈ సంఖ్య 2,400కు పెరిగినట్లు ఆయన తెలిపారు.

“రాష్ట్రంలో ప్రతిరోజు ఐదారు చోట్ల పిల్లలపై లైంగిక దాడులు జరుగుతున్నాయి. ప్రభుత్వం పట్టించుకోవడం లేదు” అని హరీష్ రావు ఆరోపించారు. గత ప్రభుత్వ హయాంలో మహిళల భద్రత కోసం షీ టీమ్స్, ప్రత్యేక మహిళా విభాగాన్ని అదనపు డిజీ స్థాయిలో ఏర్పాటు చేశామని గుర్తు చేశారు. ప్రస్తుతం అదే అధికారికి CID, ACB బాధ్యతలు అప్పగించడంతో మహిళా భద్రతపై దృష్టి మరలిందని ఆయన విమర్శించారు.

కరీంనగర్లో బంగారు దుకాణం దోపిడీ, హైదరాబాద్‌లో అదనపు డిజీ వినయ్ రంజన్ రాయ్ ఇంట్లో చోరీ, ఖమ్మంలో మొబైల్ షాపు లూటీ వంటి ఘటనలను ఉటంకిస్తూ, శాంతి భద్రతలు పూర్తిగా కుప్పకూలాయని హరీష్ రావు ఆరోపించారు. నేరస్తులు ఇంకా పట్టుబడకపోవడం, సొత్తు రికవరీ కాలేదని ఆయన అన్నారు.

హరీష్ రావు చేసిన ఈ ఆరోపణలపై తెలంగాణ ప్రభుత్వం స్పందన తెలియాల్సి ఉంది.