సింగరేణి అవకతవకలపై సీబీఐ దర్యాప్తు చేయాలని హరీశ్ రావు డిమాండ్

సింగరేణి కాలరీస్ లిమిటెడ్ (SCCL) లో అవకతవకలు జరిగాయన్న ఆరోపణలపై మాజీ మంత్రి, ఎమ్మెల్యే హరీశ్ రావు సీబీఐ దర్యాప్తు చేయాలని డిమాండ్ చేశారు. కాంగ్రెస్ ప్రభుత్వం వచ్చాక రెండున్నరేళ్లలో సింగరేణిలో స్కీమ్స్‌కు బదులు స్కామ్స్ ఎక్కువయ్యాయని ఆయన విమర్శించారు.

సైట్ విజిట్ సర్టిఫికెట్ పేరుతో కాంగ్రెస్ నాయకులు తమకు కావలసిన వారికే టెండర్లు కట్టబెడుతున్నారని హరీశ్ రావు ఆరోపించారు. సింగరేణి పుట్టినప్పటి నుంచి ఇటీవల వరకు ఈ పద్ధతి లేదని, ఈ కొత్త విధానం ద్వారా ఎంపిక చేసిన కాంట్రాక్టర్లు వేల కోట్ల రూపాయలు నష్టం చేశారని వివరించారు. మొత్తం ఆరోపణలపై సీబీఐ సమగ్ర విచారణ జరపాలని ఆయన కోరారు.

ఇదిలా ఉండగా, సింగరేణి నుంచి 40 లక్షల టన్నుల బొగ్గు (సుమారు ₹1,600 కోట్లు) మాయమైనట్టు మీడియాలో వచ్చిన కథనాలపై కేంద్ర బొగ్గు గనుల మంత్రి కిషన్ రెడ్డి ముఖ్యమంత్రి రేవంత్ రెడ్డికి బహిరంగ లేఖ రాశారు. ఈ వ్యవహారంపై సమగ్ర విచారణ జరపాలని విజ్ఞప్తి చేశారు. భద్రతా చర్యలు కఠినతరం చేయాలని లేఖలో కోరారు.

అయితే, ఉపముఖ్యమంత్రి భట్టి విక్రమార్క ఈ ఆరోపణలను తోసిపుచ్చారు. సింగరేణిని నిర్వీర్యం చేసి ప్రైవేట్ సంస్థలకు ఇచ్చేందుకు బీఆర్ఎస్, కేంద్రంలోని బీజేపీ కుట్ర పన్నుతున్నాయని ఆయన ఆరోపించారు. మాజీ మంత్రి హరీశ్ రావు పదేళ్ల అధికార కాలంలో సింగరేణికి ₹9,764 కోట్ల నష్టం జరిగేలా చేశారని, ఈ విషయాన్ని లెక్క పత్రంతో నిరూపించడానికి సిద్ధమని భట్టి సవాలు చేశారు. తమపై చేస్తున్న ఆరోపణలు రాజకీయ ప్రేరితమని, తప్పుడు ప్రచారం ద్వారా సింగరేణిని బలహీనపరిచే ప్రయత్నమని ఆయన ఖండించారు.