పార్టీ మార్పుపై హరీశ్ రావు స్పష్టత: బీఆర్ఎస్‌లో కొనసాగుతా; రేవంత్‌పై పలు ఆరోపణలు

బీఆర్ఎస్ సీనియర్ నాయకుడు హరీశ్ రావు తాను పార్టీ మారడం లేదని స్పష్టం చేశారు. ఇటీవలి ఊహాగానాల నేపథ్యంలో ఆయన ఈ ప్రకటన చేశారు. ఈ సందర్భంగా సీఎం రేవంత్ రెడ్డిపై పలు ఆరోపణలు చేశారు.

హరీశ్ రావు మాట్లాడుతూ, ‘నా పుట్టుక బీఆర్ఎస్‌లో, నా జీవితం అంతా బీఆర్ఎస్‌తోనే. కేసీఆర్‌కు నా విధేయత శాశ్వతం’ అన్నారు. రేవంత్ రెడ్డి నాలుగు పార్టీలు మారారని, ఆయన మాటలకు విశ్వసనీయత లేదని విమర్శించారు.

రుణమాఫీ, రైతు బంధు నిధులు, 24 గంటల ఉచిత విద్యుత్ వంటి హామీలను రేవంత్ ప్రభుత్వం నిలబెట్టలేదని హరీశ్ రావు ఆరోపించారు. ‘రైతు కమిషన్ చైర్మన్ కూడా మూడు గంటల కరెంటు సరిపోతుందని ఈఆర్సీ ముందు వాదించారు’ అని గుర్తు చేశారు.

కొత్తగా ఏర్పాటైన టీజీఆర్పీడీసీఎల్‌కు అధికంగా పునరుత్పాదక శక్తి (సౌర విద్యుత్) కేటాయించడాన్ని హరీశ్ రావు ప్రస్తావించారు. ‘జీఓ నంబర్ 8 ప్రకారం, టీజీఆర్పీడీసీఎల్‌కు అధిక వాటా రిన్యూవబుల్ ఎనర్జీని ఇస్తున్నారు. సోలార్ పవర్ ఉదయం 7 నుంచి సాయంత్రం 5-6 గంటల వరకే లభిస్తుంది. అంటే రోజుకు 8-9 గంటల విద్యుత్ మాత్రమే. 24 గంటల ఉచిత విద్యుత్ సాధ్యం కాదు’ అని వివరించారు.

‘గుజరాత్‌లో రైతులకు 7 గంటలు, కర్ణాటకలో 8 గంటల కరెంటు మాత్రమే ఇస్తున్నారు. రేవంత్ రెడ్డి ధైర్యం ఉంటే 24 గంటల ఉచిత విద్యుత్ ఇస్తానని చెప్పి ఓట్లు అడగాలి’ అని హరీశ్ రావు సవాల్ విసిరారు. ఈ ఆరోపణలపై సీఎం రేవంత్ రెడ్డి స్పందన తెలియాల్సి ఉంది.