ఉత్తర తెలంగాణకు హీట్ వేవ్ హెచ్చరిక, దక్షిణ జిల్లాల్లో భారీ వర్షం

తెలంగాణలో రాబోయే రెండు, మూడు రోజుల్లో వివిధ వాతావరణ పరిస్థితులు కొనసాగుతాయని ఐఎండి (భారత వాతావరణ శాఖ) తెలిపింది. ఉత్తర జిల్లాల్లో ఎండ తీవ్రత, వడగాలులు వీస్తాయని, దక్షిణ జిల్లాల్లో భారీ వర్షాలు కురుస్తాయని హెచ్చరికలు జారీ చేసింది.

రేపు (12 జూన్) ఆదిలాబాద్, కొమరంభీం-ఆసీఫాబాద్, మంచిర్యాల, నిర్మల్, నిజామాబాద్, జగిత్యాల, కరీంనగర్, పెద్దపల్లి జిల్లాల్లో ఒకటి రెండు చోట్ల హీట్ వేవ్ ఉంటుందని ఐఎండి సూచించింది. ఈరోజు మంచిర్యాల జిల్లా వేమనపల్లిలో 43° సెల్సియస్, భద్రాద్రి కొత్తగూడెం జిల్లా లక్ష్మీదేవిపల్లిలో 42.9° సెల్సియస్ ఉష్ణోగ్రతలు నమోదయ్యాయి. ఇతర ప్రాంతాల్లో 40° సెల్సియస్ పైగా నమోదు కావడంతో వడగాలులు వీస్తాయని అధికారులు హెచ్చరించారు.

దక్షిణ తెలంగాణ జిల్లాలైన నల్గొండ, సూర్యాపేట, మహబూబాబాద్, నాగర్కర్నూల్ జిల్లాల్లో ఉరుములు, మెరుపులతో కూడిన భారీ వర్షాలు కురుస్తాయని ఐఎండి తెలిపింది. గంటకు 40 నుంచి 50 కిలోమీటర్ల వేగంతో ఈదురుగాలులు వీస్తాయని హెచ్చరించింది. రేపు మహబూబాబాద్, వరంగల్, హనుమకొండ, మహబూబ్ నగర్, నాగర్కర్నూల్ జిల్లాలకు కూడా భారీ వర్ష సూచన ఉంది.

నైరుతి ఋతుపవనాలు భద్రాద్రి కొత్తగూడెం, హైదరాబాద్, వికారాబాద్ వరకు విస్తరించాయి. రానున్న 2-3 రోజుల్లో రాష్ట్రమంతటా విస్తరించే అవకాశం ఉంది. వర్షాకాలం ప్రారంభమైనప్పటికీ హీట్ వేవ్ ప్రభావంతో ఋతుపవనాల విస్తరణ మందగించిందని వాతావరణ శాఖ అధికారులు తెలిపారు.

ప్రజలు ఎండ తీవ్రత ఉన్న సమయంలో (11 గంటల నుంచి) బయట తిరగకుండా జాగ్రత్తలు తీసుకోవాలని, భారీ వర్షాలు ఉన్న ప్రాంతాల్లో అప్రమత్తంగా ఉండాలని ఐఎండి సూచించింది.