ఏపీలో మూడు రోజుల పాటు భారీ నుంచి అతిభారీ వర్షాలు; వాతావరణ శాఖ హెచ్చరిక

బంగాళాఖాతంలో అల్పపీడనం ఏర్పడటంతో ఆంధ్రప్రదేశ్‌లో మరో మూడు రోజుల పాటు భారీ నుంచి అతిభారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఉత్తరాంధ్ర తీరం వెంబడి గంటకు 40-50 కి.మీ వేగంతో ఈదురుగాలులు వీస్తాయని తెలిపింది.

అల్లూరి సీతారామరాజు, ఏలూరు, శ్రీకాకుళం, విజయనగరం, పార్వతీపురం మన్యం జిల్లాలతో పాటు కోస్తా ప్రాంతాల్లో భారీ వర్షం పడే అవకాశం ఉంటుంది. కొన్నిచోట్ల ఉరుములు, మెరుపులతో కూడిన వర్షం కురుస్తుందని, పిడుగులు పడే ప్రమాదం ఉందని హెచ్చరించారు. మత్స్యకారులు ఎవరూ సముద్రంలో వేటకు వెళ్లరాదని, సముద్రం అలజడిగా ఉండి ఎత్తైన అలలు ఏర్పడే అవకాశం ఉన్నందున నాలుగైదు రోజుల పాటు జాగ్రత్తలు పాటించాలని అధికారులు సూచించారు.

రాష్ట్ర ప్రభుత్వం ముందస్తు చర్యలు చేపట్టింది. విజయనగరం జిల్లాలో 100 మంది యువకులకు ‘యువ ఆపద మిత్ర’ పథకం కింద విపత్తు నిర్వహణ శిక్షణ ఇచ్చారు. ఎన్డీఆర్ఎఫ్, ఎస్డీఆర్ఎఫ్ బృందాలను సిద్ధంగా ఉంచారు. డ్రైనేజీ వ్యవస్థను శుభ్రం చేయించి, కాలువల్లో పూడిక తొలగించడం, వరద నీటిని మళ్లించే ఏర్పాట్లు చేశారు.

తెలంగాణలోని ఖమ్మం, కరీంనగర్, వరంగల్, ఆదిలాబాద్, నిజామాబాద్ జిల్లాల్లో కూడా మోస్తరు నుంచి భారీ వర్షాలు కురిసే అవకాశం ఉందని నిపుణులు అంచనా వేస్తున్నారు. ప్రజలు అత్యవసరమైతే హెల్ప్‌లైన్ నంబర్లను సంప్రదించాలని, సెల్‌ఫోన్‌ల్లో హెచ్చరిక సందేశాలు పంపిస్తున్నామని అధికారులు తెలిపారు.