ఆంధ్రప్రదేశ్‌కు 6 రోజులు భారీ వర్షాలు: ఈ నెల 13న బంగాళాఖాతంలో అల్పపీడనం

ఈ నెల 13న బంగాళాఖాతంలో అల్పపీడనం ఏర్పడే అవకాశం ఉంది. దీని ప్రభావంతో నేటి నుంచి 6 రోజుల పాటు కోస్తాంధ్ర, రాయలసీమ ప్రాంతాల్లో విస్తారంగా వర్షాలు కురిసే అవకాశం ఉందని వాతావరణ శాఖ అధికారులు తెలిపారు.

ఇప్పటికే ఉత్తరాంధ్రలోని అల్లూరి సీతారామరాజు, పార్వతీపురం మన్యం, విజయనగరం, శ్రీకాకుళం, విశాఖపట్నం, అనకాపల్లి జిల్లాల్లో అక్కడక్కడా వర్షాలు కురుస్తున్నాయి. తిరుపతి, చిత్తూరు, గుంటూరు, నెల్లూరు, ఏలూరు జిల్లాలతో సహా మిగతా ప్రాంతాల్లోనూ మోస్తరు నుంచి భారీ వర్షాలు నమోదయ్యే అవకాశం ఉందని అధికారులు చెప్పారు.

గతంలో ఏర్పడిన అల్పపీడనాలు ఎల్నీనో ప్రభావంతో బలహీనపడగా, ఈసారి ఏర్పడుతున్న అల్పపీడనం విస్తారంగా వర్షాలు కురిపించనుందని వాతావరణ నిపుణులు అంచనా వేస్తున్నారు. దీంతో వర్షం కోసం ఎదురుచూస్తున్న రైతులకు ఊరట లభించే అవకాశం ఉంది.

భారీ వర్షాల దృష్ట్యా విపత్తు నిర్వహణ సంస్థ అప్రమత్తమైంది. ఎన్డీఆర్ఎఫ్, ఎస్డీఆర్ఎఫ్ బృందాలను సిద్ధంగా ఉంచారు. లోతట్టు ప్రాంతాల ప్రజలకు ముందస్తు హెచ్చరికలు జారీ చేశారు. డ్రైనేజీల్లో పూడికలు తొలగించడంతోపాటు, సురక్షిత ప్రాంతాలకు తరలించే చర్యలు కూడా తీసుకుంటున్నట్లు అధికారులు తెలిపారు.