హైదరాబాద్‌లో భారీ వర్షం: 9 విమానాలు దారి మళ్ళింపు; సీఎం రేవంత్ రెడ్డి కూడా ప్రభావితం

హైదరాబాద్ శంషాబాద్ అంతర్జాతీయ విమానాశ్రయంలో నిన్న రాత్రి భారీ వర్షం కారణంగా విమాన రాకపోకలకు అంతరాయం ఏర్పడింది. ప్రతికూల వాతావరణం వల్ల 9 విమానాలను అధికారులు దారి మళ్ళించారు.

ATC ల్యాండింగ్‌కు అనుమతి ఇవ్వకపోవడంతో ఈ విమానాలను బెంగళూరు, చెన్నై, విశాఖపట్నంలకు మళ్లించారు. ముంబై-హైదరాబాద్ రెండు విమానాలు, పూణే, నాందేడ్, ఢిల్లీ నుంచి వచ్చే విమానాలు బెంగళూరుకు మళ్లించారు. వారణాసి-హైదరాబాద్ విమానం చెన్నైకి, బెంగళూరు-హైదరాబాద్ విమానం విశాఖపట్నానికి మళ్లింది. మరో ముంబై-హైదరాబాద్ విమానం కూడా చెన్నైకు మళ్లించగా, సింగపూర్ నుంచి వచ్చే అంతర్జాతీయ విమానం కూడా దారి మళ్లింది.

తెలంగాణ ముఖ్యమంత్రి రేవంత్ రెడ్డి ఢిల్లీ నుంచి హైదరాబాద్ వస్తుండగా ఆయన ప్రయాణిస్తున్న విమానం కూడా బెంగళూరుకు మళ్లింది. రాత్రి బెంగళూరులో బస చేసిన ఆయన ఈ ఉదయం రోడ్డు మార్గంలో హైదరాబాద్ చేరుకున్నారు.

ఏ విమానం రద్దు కాలేదని, కేవలం దారి మళ్లించినట్లు అధికారులు స్పష్టం చేశారు. ప్రస్తుతం వాతావరణం అనుకూలంగా ఉండటంతో విమాన రాకపోకలు యథావిధిగా కొనసాగుతున్నాయి. విమానాలు దారి మళ్లించడంతో ప్రయాణికులు కొంత ఇబ్బందులకు గురయ్యారు.