హైదరాబాద్, తెలంగాణలో భారీ వర్షం – ఐఎమ్‌డీ ఆరెంజ్ అలర్ట్

హైదరాబాద్‌తో పాటు తెలంగాణలోని పలు జిల్లాల్లో భారీ వర్షం కురుస్తోంది. వాయువ్య బంగాళాఖాతంలో ఏర్పడిన తీవ్ర వాయుగుండం కారణంగా రెండు రోజుల పాటు వర్షాలు కొనసాగే అవకాశం ఉందని వాతావరణ శాఖ హెచ్చరించింది.

కరీంనగర్, వరంగల్, ఆదిలాబాద్, సిద్దిపేట తదితర జిల్లాల్లో మోస్తారు నుంచి భారీ వర్షం పడుతోంది. హుజురాబాద్, శంకరపట్నం, సైదాపూర్ మండలాల్లో వర్షం రోడ్లపై నీరు నిలిచేలా చేసింది.

రాష్ట్ర రాజధాని హైదరాబాద్‌లో కూడా వాతావరణం ఒక్కసారిగా మారి, అనేక ప్రాంతాల్లో జోరువాన పడింది. కూకట్‌పల్లి, నిజాంపేట, బాచుపల్లి, కుత్బుల్లాపూర్, మేడ్చెల్, బంజారా హిల్స్, జూబ్లీ హిల్స్, సికింద్రాబాద్, బేగంపేట సహా నగరంలోని పలు ప్రాంతాల్లో వర్షం కురిసింది. ఐఎమ్‌డీ హైదరాబాద్‌కు ఆరెంజ్ అలర్ట్ జారీ చేసింది. మేడ్చల్-మల్కాజిగిరి, రంగారెడ్డి, సంగారెడ్డి జిల్లాలకు కూడా ఆరెంజ్ అలర్ట్ కొనసాగుతోంది. మరో రెండు మూడు గంటల పాటు ఇదే పరిస్థితి కొనసాగే అవకాశం ఉంది.

ఈదురుగాలులు గంటకు 30 నుంచి 40 కి.మీ వేగంతో వీస్తాయి. చెట్లు విరిగిపడే, పురాతన భవనాలు కూలే ప్రమాదం ఉంది. ప్రజలు చెట్ల కింద, శిథిలమైన భవనాల కింద నిలబడవద్దని అధికారులు సూచించారు.

వర్షం కారణంగా లోతట్టు ప్రాంతాల్లో నీరు నిలిచింది. జీహెచ్‌ఎంసీ 144 పాయింట్లను వాటర్ లాగింగ్ ప్రాంతాలుగా గుర్తించి, ముందస్తు చర్యలు చేపట్టింది. ఆఫీసు సమయం ముగిసే సమయంలో వర్షం పడడంతో ట్రాఫిక్ జామ్ అయింది. ఐటీ కారిడార్‌లో రద్దీ ఎక్కువగా ఉంది. ట్రాఫిక్ పోలీసులు ప్రజలను ఒకేసారి లాగవుట్ కాకుండా, అవసరమైతేనే బయటికి రావాలని కోరారు. విద్యుత్ శాఖకు కూడా ప్రత్యేక బులెటిన్ జారీ చేసి, ప్రమాదాల పట్ల అప్రమత్తం చేశారు.

రాబోయే రెండు మూడు గంటల పాటు వర్షం కొనసాగే అవకాశం ఉంది. ప్రజలు అప్రమత్తంగా ఉండాలని వాతావరణ శాఖ సూచించింది.