ఉత్తర భారతంలో భారీ వర్షాలు: పలు రాష్ట్రాల్లో జనజీవనం స్తంభించింది

దేశంలోని పలు రాష్ట్రాల్లో భారీ వర్షాలు కురుస్తున్నాయి. ఉత్తరప్రదేశ్, హర్యాణా, ఢిల్లీ, ఉత్తరాఖండ్ రాష్ట్రాల్లో ఎడతెరిపి లేని వర్షం కారణంగా జనజీవనం అస్తవ్యస్తంగా మారింది. పలు ప్రాంతాల్లో లోతట్టు ప్రాంతాలు నీట మునిగాయి. రోడ్లపై నీళ్లు నిలిచి వాహనదారులు, విద్యార్థులు, ఉద్యోగులు తీవ్ర ఇబ్బందులు ఎదుర్కొంటున్నారు.

హర్యాణాలోని గురుగ్రాం, అంబాలా ప్రాంతాల్లో భారీ వర్షం కారణంగా రోడ్లపై మోకాల లోతు నీరు నిలిచింది. గురుగ్రాం మొత్తం జలమయమైంది. విద్యుత్ తీగలు తెగిపోవడంతో విద్యుత్ సరఫరాకు అంతరాయం కలిగింది. రెస్క్యూ సిబ్బంది సహాయక చర్యలు చేపట్టారు. ఢిల్లీ NCR లో రాత్రి నుంచి కురుస్తున్న భారీ వర్షంతో ట్రాఫిక్ జామ్ అయింది. స్కూళ్లు, కాలేజీలు, ఆఫీసులకు వెళ్లేవారు ఇబ్బందులు పడ్డారు.

ఉత్తరాఖండ్లోని రుద్రప్రయాగ్ జిల్లాలో భారీ వర్షాలతో అలకనంద, మందాకిని నదులు ఉదృతంగా ప్రవహిస్తున్నాయి. వెస్ట్ బెంగాల్లోనూ వర్షాలు కొనసాగుతున్నాయి. అక్కడి లోతట్టు ప్రాంతాలు జలదిగ్బంధంలో చిక్కుకున్నాయి. కేరళ, తమిళనాడు, గుజరాత్ రాష్ట్రాల్లో కూడా వర్షాలు పడుతున్నాయి. ఆయా ప్రాంతాల్లో సహాయక చర్యలు కొనసాగుతున్నాయి.