రాజన్న సిరిసిల్లలో భారీ వర్షం: చెట్టు కూలి విద్యుత్ స్తంభం విరిగింది

రాజన్న సిరిసిల్ల జిల్లాలో భారీ వర్షం కురిసింది. అనంతనగర్‌లోని అమృత హాస్పిటల్ సమీపంలో ఈదురు గాలుల ధాటికి పెద్ద చెట్టు నేలకూలింది.

చెట్టు పడటంతో విద్యుత్ స్తంభం విరిగిపోయింది. ట్రాన్స్‌ఫార్మర్ కూడా నేలకూలింది. అక్కడ ఉన్న కారుపై విద్యుత్ తీగలు తెగిపడ్డాయి. దీంతో అనంతనగర్ ప్రాంతంలో విద్యుత్ సరఫరా పూర్తిగా నిలిచిపోయింది.

రోడ్డుపై చెట్టు అడ్డంగా పడటంతో వాహన రాకపోకలకు అంతరాయం కలిగింది. సిరిసిల్ల పోలీసులు, విద్యుత్ శాఖ సిబ్బంది సంఘటనా స్థలానికి చేరుకున్నారు. చెట్టు తొలగింపు, రవాణా పునరుద్ధరణకు సహాయక చర్యలు చేపట్టారు.

ట్రాన్స్‌ఫార్మర్ కూలడంతో మరమ్మత్తుకు సమయం పట్టే అవకాశం ఉందని అధికారులు తెలిపారు.

హైదరాబాద్ వాతావరణ కేంద్రం తెలంగాణలో మరో ఐదు రోజులు వర్షాలు కురుస్తాయని హెచ్చరించింది. ఉరుములు, మెరుపులు, ఈదురు గాలులతో కూడిన వర్షాలు పడతాయని పేర్కొంది. నల్గొండ, సూర్యాపేట, ఖమ్మం, కొత్తగూడెం, వికారాబాద్, సంగారెడ్డి, మెదక్, కామారెడ్డి, మహబూబ్‌నగర్, నాగర్‌కర్నూల్, వనపర్తి, నారాయణపేట, గద్వాల్ జిల్లాలకు yellow alert జారీ చేశారు.