తెలంగాణలో భారీ వర్షాలు, రోడ్లు జలమయం; మరో 5 రోజుల పాటు వర్ష హెచ్చరిక

తెలంగాణలో ఈదురు గాలులు, ఉరుములు, మెరుపులతో భారీ వర్షాలు కురుస్తున్నాయి. కరీంనగర్, నల్గొండ, ఆదిలాబాద్, వికారాబాద్ జిల్లాలతో పాటు యాదాద్రి భువనగిరి జిల్లా చౌటుప్పల్, నారాయణపురం, భూదాన్ పోచంపల్లి మండలాల్లో వర్షం బీభత్సం సృష్టించింది. పెద్ద చెట్లు విరిగి రోడ్లపై పడటంతో రాకపోకలు నిలిచిపోయాయి. విద్యుత్ స్తంభాలు విరగడంతో అనేక ప్రాంతాల్లో విద్యుత్ సరఫరా నిలిచిపోయింది.

నల్గొండ జిల్లా మునుగోడు మండలంలో వరద నీరు రోడ్లపైకి చేరింది. మునుగోడు – చెండూరు మధ్య రాకపోకలు పూర్తిగా నిలిచిపోయాయి. మునుగోడు చౌటుప్పుల ప్రధాన రహదారిపై కూడా వరద నీరు ఉధృతంగా ప్రవహించింది. బుడిగ జంగాల కాలనీలోకి వరద నీరు ప్రవేశించి దాదాపు రెండు లక్షల రూపాయల విలువైన సామాన్లు కొట్టుకుపోయాయి.

వరంగల్ జిల్లా దుగ్గండి మండలం లక్ష్మీపురం గ్రామ రైతు యుగేందర్ సాగు చేసిన 17 ఎకరాల అరటి తోట బలమైన ఈదురు గాలులకు దెబ్బతింది. ఎకరాకు లక్ష రూపాయల వరకు పెట్టుబడి పెట్టినట్లు, మార్కెట్లో కేజీ రూ.25–26 ధర ఉందని, ప్రభుత్వం తనను ఆదుకోవాలని ఆయన విజ్ఞప్తి చేశారు.

భారత వాతావరణ శాఖ (IMD) మరో 4-5 రోజుల పాటు రాష్ట్రంలో వర్షాలు కురిసే అవకాశం ఉందని తెలిపింది. దక్షిణ తెలంగాణ జిల్లాలైన నాగర్ కర్నూల్, సూర్యాపేట, నల్గొండ, రంగారెడ్డి, నారాయణపేట జిల్లాలకు యెల్లో అలర్ట్ జారీ చేసింది. రాష్ట్రవ్యాప్తంగా ఉరుములు, మెరుపులతో పాటు గంటకు 40-50 కి.మీ. వేగంతో ఈదురు గాలులు వీచే అవకాశం ఉందని IMD పేర్కొంది.

నైరుతి ఋతుపవనాలు నెమ్మదిగా కదులుతున్నాయి. ఈ నెల 18 వరకు రాష్ట్రవ్యాప్తంగా విస్తరించే అవకాశం ఉందని వాతావరణ శాఖ సమాచారం. ఎల్నినో ప్రభావంతో జూలై, ఆగస్టులో వర్షాలు తగ్గే అవకాశం ఉందని, పూర్తి ఎల్నినో అక్టోబర్-నవంబర్‌లో ఏర్పడుతుందని నిపుణులు అంచనా వేస్తున్నారు. రైతులు వర్షపాతానికి అనువైన పంటలు సాగు చేయాలని, నీటిని కాపాడుకోవాలని వ్యవసాయ నిపుణులు సూచిస్తున్నారు.